Бугун,

  • USD 10920.28
  • RUB 177.49
  • EUR 11052.42

Жонс Ҳопкинс университети маълумотларига кўра, дунёда коронавирусни юқтириб олганлар сони 179 599 617 кишига етган, шуларнинг 3 891 945 нафари вафот этган. Касалланиш ҳолатларининг кўплиги бўйича АҚШ (33,5 миллион), Ҳиндистон (30 миллион), Бразилия (18,1 миллион), Франция (5,8 миллион) ва Туркия (5,3 миллион) етакчилик қилмоқда.

Токиода ёзги Олимпия ўйинлари ўтказилишига қарши навбатдаги акция бўлиб ўтди
Фото: AP Photo

Бразилияда коронавирусга чалинганлар сони бўйича рекорд қайд этилди

Бразилияда пандемия бошидан буён бир кеча-кундузда коронавирус билан касалланганлар сони бўйича янги рекорд ўрнатилди — бир кунда 115 228 кишида вирус аниқланди. Сўнгги бир суткада мамлакатда 2392 киши COVID-19 оқибатида вафот этди. Шу тариқа бутун пандемия даврида касалланганлар сони 18,16 миллион, вафот этганлар эса 507,1 минг кишига етди.

Бундан аввалги рекорд мамлакатда 25 март куни қайд этилган эди. Ўшанда бир кеча-кундузда 100 158 кишида вирус аниқланган эди. Касалланиш ҳолатларининг кескин ўсиши 22 июндан бошлаб кузатилмоқда.

Бурятияда коронавирус туфайли локдаун эълон қилинди

Россия таркибига кирувчи Бурятия Республикаси ҳукумати коронавирус инфекцияси тарқалиши муносабати билан Республика ҳудудида локдаун киритилишини эълон қилди.

27 июндан 11 июлгача ҳудудда ишланмайдиган кунлар режими эълон қилинди. Бу вақт оралиғида барча корхоналар ўз фаолиятини тўхтатади, энг зарур маҳсулотлар билан савдо қилувчи дўконлар, дорихоналар, жамоат транспорти, ОАВлар ва уй-жой ва коммунал хизматлари бундан мустасно.

Оммавий дам олиш жойларига, хусусан, Байкал кўли атрофига кириш чекланади. Бундан ташқари, 14 ёшгача бўлган болалар фақат катталар ҳамроҳлигида кўчага чиқиши мумкин.

Подмосковеда дронлар қурилиш майдонларидаги ишчиларга ниқоб тақишни эслатиб туради

Подмоскове (Москва вилояти)да коптерлар қурилиш майдонлари устида учиб, ниқоб режими ва ижтимоий масофага риоя қилиш зарурати ҳақида огоҳлантиради, бу ҳақда Москва вилояти қурилиш идораси вакили маълум қилди. «Коптерларнинг парвоз ҳудуди — бутун Москва вилояти. Парвозлар ҳар куни амалга оширилади», — деди у.

Айни пайтгача дронлар Подмосковедаги қурилиш майдонларининг тахминан 70 фоизини айланиб учиб чиққан.

Биринчи навбатда парвозлар COVID-хавфсизлик кўрсаткичи паст бўлган қурилиш майдонларида амалга оширилган. Дронлар парвози эпидемиологик вазият барқарорлашмагунича давом этади.

Шунингдек:
  • Кипрдаги Никосия университети тадқиқотчилари коронавирус ҳавода дарахт гулчанглари орқали тарқалиши мумкинлигини аниқлади. Маълум бўлишича, COVID-19’нинг авж нуқталари ва ҳаводаги гулчанглари концентрацияси ўртасида боғлиқлик бор.
  • Жаҳон соғлиқни сақлаш ташкилоти (ЖССТ) болалар ва ўсмирларни коронавирусга қарши эмлашга чақирди. Ташкилот биринчи марта болаларни COVID-19’га қарши эмлаш мумкинлигини маълум қилди. Бунгача ЖССТ COVID-вакциналарнинг болаларга қандай таъсир қилиши ҳақидаги маълумотлар етарли эмаслигини айтиб, уларни эмлашни маслаҳат бермаган эди.
  • Грецияда 24 июндан кўчада ниқоб тақиш мажбурияти, 28 июндан эса комендантлик соати бекор қилинмоқда. Мамлакатда коронавирусга чалиниш бўйича янги ҳолатлар камайгани сабабли шундай қарор қабул қилинди.
  • Исроилда эса, аксинча, COVID-19 қайтадан авж олиши туфайли чекловлар яна кучайтирилмоқда. Халқаро аэропортда, чегарадан ўтиш жойларида ва тиббий ёрдам кўрсатиладиган жойларда ниқоб тақиш мажбурий бўлди. Вакцинация ҳақидаги сертификати бўлган одамлар «дельта» штаммига чалинган одам билан мулоқот қилган бўлса, карантинга юборилиши мумкин.

Изоҳ
Асосий янгиликлар