Motorola Британиянинг ҳимояланган телефонлар ишлаб чиқариш билан шуғулланувчи Bullitt Group компанияси билан битим имзолаган бўлиб, 17 июнь куни ушбу ҳамкорликнинг илк натижаси Motorola Defy (2021) номи остида тақдим этилди, деб хабар беради IXBT.
Фото: IXBT
Motorola Defy смартфони HD+ сифатни қўллаб-қувватлайдиган 6,5 дюймли дисплей билан жиҳозланган бўлиб, у Corning Gorilla Glass Victus ойнаси билан ҳимояланган. Фронтал қисмида 8 мегапикселли селфи камера учун томчисимон қирқим мавжуд. Телефон мустаҳкам пластик корпусга эга, сув ва чангдан IP68 стандарти бўйича ҳимояланган. Шунингдек, Motorola’нинг маълум қилишича, Defy модели Цельсий бўйича -25 даражадан +55 даражада ишлай олади. Янги Motorola Defy 1,8 метр баландликдан тушиб кетишга ҳам бардошли.
Смартфоннинг асосий камераси 48 мегапикселни ташкил этиб, унга қўшимча равишда макро суратга олишлар ва чуқурликни ўлчаш учун 2 мегапикселли камералар ўрнатилган. Смартфон бир кристалли Snapdragon 662 тизими базасида яратилган, тезкор хотираси 4 гигабайтни, ички хотираси эса 64 гигабайтни ташкил этади. Аккумулятор сиғими 5000 мА/соат ва 20 ваттли тезкор қувватланиш функциясига эга. Қурилма Android 11 операцион тизимида ишлайди, шунингдек, унга 3,5 миллиметрли разём ва USB-C ўрнатилган.
Фото: IXBT
Motorola Defy кейинги ҳафтада Европа бозорларида 325 доллар қийматида сотувга чиқади.
Аввалроқ ечиладиган аккумуляторга эга «ўлмайдиган» смартфон — Samsung Galaxy ХCover5 тақдим этилгани тўғрисида хабар берилганди.
