Жонс Ҳопкинс университети маълумотларига қараганда, дунёда коронавирусга чалинганлар сони 176 967 559 кишини ташкил қилмоқда. Вирус оқибатида вафот этганлар сони 3 830 585 кишига етди. Касалланиш ҳолатларининг кўплиги бўйича АҚШ (33,4 миллион), Ҳиндистон (29,6 миллион), Бразилия (17,6 миллион), Франция (5,8 миллион) ва Туркия (5,3 миллион) етакчилик қилмоқда.
Париждаги жазирама
Фото: EPA
Ҳиндистонда икки ойлик танаффусдан кейин Тожмаҳал очилди
16 июнь куни Ҳиндистонда Тожмаҳал мақбараси ташрифчилар учун очилди. Меъморий мажмуа мамлакатда коронавирус авж олгани туфайли икки ой давомида ёпиқ бўлганди. Мажмуа ҳудудига бир вақтнинг ўзида кўпи билан 650 киши киритилади.
«Барча ташрифчилар ниқоб тақиши керак, меҳмонлар махсус жамоалар томонидан кузатиб борилади», — деди Агра шаҳри бўйича Ҳиндистон Меъморий бошқармаси бошлиғи Васант Кумар Саварнкар.
Унинг сўзларига кўра, чипталарни фақат онлайн тарзда сотиб олиш мумкин бўлади. Тожмаҳалнинг мармар деворларига қўл теккизиш қатъиян тақиқланади. Ташрифчилар дезинфекцияловчи восита шимдирилган губкали қопламага эга махсус йўлаклардангина юриши мумкин.
Илгарилари Тожмаҳалга бир кунда ўртача 40 минг киши ташриф буюрган.
Мавзуга доир: ЖССТ Ҳиндистондаги коронавирус билан боғлиқ оғир вазият исталган давлатда юз бериши мумкинлигидан огоҳлантирди
Францияда ниқоб режими юмшатилиб, комендантлик соати бекор қилинди
Францияда 17 июндан кўчада ниқоб тақиш мажбурияти бекор қилинди. Бу ҳақда бош вазир Жан Кастекс маълум қилди.
Бундан ташқари, 20 июндан бошлаб 23:00 дан 06:00 гача амал қилиб келаётган комендантлик соати бекор бўлади. Аслида режа бўйича бу чора 30 июнгача амал қилиши керак эди.
Одамлар кўп тўпланадиган жойларда, навбатларда ва ёпиқ биноларда ниқоб тақиш мажбурияти сақланиб қолади.
Мавзуга доир: Франция президенти мамлакатда карантин юмшатилгани муносабати билан кафега ташриф буюрди
Украинада карантин 31 августгача узайтирилди
Украина Вазирлар Маҳкамаси 16 июнь куни мамлакатдаги карантинни 31 августгача узайтириб, янги карантин чекловларини жорий қилди.
Бутун мамлакат ҳудудида эпидемик хавфнинг «яшил» даражаси ўрнатилмоқда, бунда жамоат транспортида ва оммавий тадбирлар чоғида ниқоб режими сақланиб қолади.
Умумий овқатланиш ва кўнгилочар муассасалар (тунги клублар), кинотеатрлар ва маданият соҳасидаги бошқа заллар ҳамда ниқоб режимига риоя қилган ҳолда бошқа оммавий тадбирлар ўтказилишига рухсат берилади.
Мавзуга доир: Украинада COVID-19 сабабли карантин муддати узайтирилди
Беларусь ўзининг коронавирусга қарши вакцинасини синашни бошлайди
Беларусда Эпидемиология ва микробиология Республика илмий-амалий марказида мамлакатда ишлаб чиқилган COVID-19’га қарши вакцина синовлари бошланади.
Тажрибавий намуна устидаги ишлар кузгача якунланиши ва 2022 йилда вакцинани ялпи ишлаб чиқариш бошланиши режалаштирилган.
