Жиззахда шаҳар ҳокимининг қарорига вилоят прокуратураси томонидан келтирилган протестни танишлари орқали 2,5 минг доллар эвазига бекор қилдиришни ваъда қилган шахс ушланди. Бу ҳақда Бош прокуратура ҳузуридаги департамент матбуот хизмати хабар берди.

Маълум қилинишича, Бош прокуратура ҳузуридаги департамент ҳамда ДХХнинг Жиззах вилояти бошқармалари томонидан вилоят прокуратураси билан ҳамкорликда тезкор тадбир ўтказилган. Тадбирда фуқаро Ш.Б. ноқонуний даромад орттириш мақсадида фуқаро Б.нинг ишончига кириб, унга Жиззах шаҳар ҳудудида хусусий таълим муассасаси қуриш учун 20 сотих ер майдони ажратиш ҳақидаги шаҳар ҳокими қарорига Жиззах вилоят прокуратураси томонидан келтирилган протестни танишлари орқали бекор қилдириб, унинг номига қайта ҳужжатлаштириб беришни ваъда қилган.

Ш.Б. «ўз хизмати» учун 2,5 минг доллар талаб қилиб, шундан аванс тариқасида 5 миллион сўмини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Маълумот учун, Ўзбекистон Президентининг 2021 йил 8 июндаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги фармонига асосан, қишлоқ хўжалигига мўлжалланган ерлар очиқ электрон танлов якунларига кўра, фақат ижара ҳуқуқи асосида ажратилади, қишлоқ хўжалигига мўлжалланмаган ерлар мулк ҳуқуқи ва ижара ҳуқуқи асосида электрон онлайн аукцион орқали реализация қилинади.

Аввалроқ Тошкентда ер олиб беришни ваъда қилиб, фуқародан 52 800 доллар олган шахс ушлангани, Андижонда 100 гектар ер ажратиб бериш эвазига 128 минг доллар пора олган мансабдор шахсларга суд ҳукми ўқилгани, сенаторлар Тошкент вилоятида Ер кодекси талаблари бажарилмаётганига оид ҳолатларни аниқлагани тўғрисида хабар берилганди.