Шавкат Мирзиёев Душанбеда тантанали кутиб олинди

Шавкат Мирзиёев Тожикистон президенти Эмомали Раҳмоннинг таклифига биноан 10 июнь куни расмий ташриф билан Тожикистонга жўнаб кетганди. Президент матбуот хизматининг хабар беришича, давлат раҳбарини Душанбе халқаро аэропортида Эмомали Раҳмон кутиб олди.

Қайд этилишича, Ўзбекистон раҳбарини кутиб олишда кўплаб ёшлар ва ижодий жамоалар ҳам иштирок этди.

Президентлар музокаралар давомида кўп қиррали Ўзбекистон—Тожикистон шериклигининг кенг кўламли кун тартибини кўриб чиқади ҳамда халқаро ва минтақавий даражадаги алоқалар юзасидан фикр алмашади. Амалий ҳамкорликни янада кенгайтириш ва мустаҳкамлашга қаратилган салмоқли ҳужжатлар тўплами имзоланиши кутилмоқда.

Аввалроқ ташриф дастурида Душанбе шаҳрида икки томонлама тадбирлар — расмий кутиб олиш маросими, тор доирадаги ва кенгайтирилган таркибдаги музокаралар, ижтимоий объектлар очилиши ва икки томонлама ҳужжатлар имзоланишига бағишланган онлайн маросимлар ўтказилиши кўзда тутилгани тўғрисида хабар берилганди.

Кўп қиррали шерикликнинг янги «ўсиш нуқталари»ни белгилаш ҳамда узоқ муддатли истиқболга мўлжалланган амалий ҳамкорликни кенгайтириш бўйича аниқ лойиҳаларни илгари суришга алоҳида эътибор қаратилади. Халқаро ва минтақавий аҳамиятга молик масалалар юзасидан фикр алмашилади.

Музокаралар якунида давлат раҳбарларининг қўшма баёноти, Ўзбекистон—Тожикистон инвестиция компаниясини ташкил этиш, саноат ва янги технологиялар соҳасидаги ҳамкорлик тўғрисидаги битимлар, қишлоқ хўжалиги соҳасидаги ҳамкорликни янада ривожлантириш бўйича «йўл харитаси» ва бошқа ҳужжатлар имзоланиши режалаштирилмоқда.

Икки томонлама ҳамкорликнинг деярли барча соҳаларини қамраб оладиган жами 30 дан зиёд ҳужжат қабул қилиниши кўзда тутилган.

Бундан ташқари, ташриф доирасида иқтисодиётнинг турли тармоқларида кооперацияни йўлга қўйиш бўйича умумий қиймати қарийб 1 миллиард доллар бўлган тижорат шартномалари ва битимлар имзоланиши кутилмоқда.

Ташриф дастуридан Душанбе шаҳрида маданий тадбирларда иштирок этиш, Сўғд вилоятида жамоатчилик вакиллари билан учрашиш, саноат объектлари билан танишиш ҳам ўрин олган.

Эслатиб ўтамиз, Шавкат Мирзиёев давлат ташрифи билан Тожикистонга 2018 йил март ойида, сўнг 2018 йилнинг сентябрь ойи охирида борганди. Кейинчалик, 2019 йил 14 июнида Осиёда ўзаро ҳамкорлик ва ишонч чоралари бўйича конференциянинг бешинчи саммитида иштирок этиш учун Тожикистонга борган.