Muborak tumani hokimi Ulug‘bek Ernazarov lavozimidan olindi. Bu haqda xabar bergan viloyat hokimligi axborot xizmati rahbari Ahror Sodiqovning yozishicha, Zoir Mirzayev tumandagi ko‘rsatkichlardan qoniqish hosil qilmagan.
Ma’lum bo‘lishicha, ayni paytda viloyat hokimi Zoir Mirzayev ishtirokida Muborak tumanida tanqidiy yig‘ilish bo‘lib o‘tmoqda.
Yig‘ilishda so‘z olgan Zoir Mirzayev Muborak tumani bo‘yicha yetishtirilgan 10,4 ming tonna go‘sht mahsulotlarining 0,7 tonnasi yoki bor yo‘g‘i 6,9 foizi qayta ishlanayotganini aytib, yetishtirilayotgan 915 tonna jun va 28 million dm teri umuman qayta ishlanmasligini tanqid qilgan.
“Hisobot davrida tumanda 1046 ta kichik biznes subyektlari mavjud bo‘lib, shundan 210 tasi yoki 20 foizi faoliyat ko‘rsatmayapti. 88,4 ming nafar aholi bo‘lgan tumanda ishsizlik yuqori. Xorijga ishlash uchun ketganlar 1334 nafarni tashkil qilmoqda. Tuman aholisi baxtiga neft-gaz zavodlari borligi — rahbarlarning omadi”, — degan Zoir Mirzayev.
Yig‘ilishda, shuningdek, tuman aholisining 27,3 foizi markazlashgan ichimlik suvi bilan ta’minlangani, 14 ta mahallaning 47 808 nafar aholisiga toza ichimlik suvi tarmoqlari yetib bormagani, 7 ta mahallaning 23431 nafar aholisiga ichimlik suvi tashib keltirilishi tilga olingan.
“Tumandagi mavjud 134 ta ko‘p qavatli uy-joyning 60 foizi yoki 81 tasi ta’mirtalab holga kelib qolgan. Dalada, zavodda mehnat qilayotgan tuman aholisi shunday sharoitda yashashga munosibmi?”, — deya savol bergan viloyat rahbari.
Zoir Mirzayev yig‘ilishda deputatlar va hokim o‘rinbosarlarini ham tanqid qilib, “Deputat uyg‘onmasa, hokim yoki o‘rinbosarlar uyg‘onmasa, tumanning salohiyati ham, yashash sharoiti ham, ta’lim tizimi ham ortga qarab ketaveradi. Aslida, rivojlanish davrida oldinga qarab harakatlanishimiz kerak emasmi?”, — degan.
Viloyat hokimi tanqidiy yig‘ilishda tuman mas’ullariga Dehqonobod tumani hokimi Zoir Aliqulov faoliyatini namuna qilib ko‘rsatgan.
“Aholining tuman rahbarlariga murojaati e’tiborsiz qolavergani sababli viloyat va respublikaga qayta-qayta murojaat qilish ko‘paygan. Dehqonobod hokimi Zoir Aliqulov tuni bilan fuqarolarni qabul qilyapti. Boshqa tuman rahbarlari qanday ishlayotganini ijtimoiy tarmoqlarda kuzatib boringlar, dedi Zoir Mirzayev”, — deya xabar beradi viloyat rahbari so‘zlaridan iqtibos keltirgan Ahror Sodiqov.
Izoh (0)