1979 йил 4 май куни Маргарет Тэтчер Буюк Британия бош вазири лавозимини эгаллаган. Сиёсатга шўнғиб кетган Тэтчер оиласини иккинчи планга қўйган.Тарихда яна қайси аёллар касбий фаолияти сабаб намунали уй бекаси бўлишдан воз кечганига тўхталиб ўтамиз.

Маргарет Тэтчер (1925—2013)

Фото: Grazia

Қатъий ва консерватив қарашлари туфайли «Темир аёл» деб аталган Маргарет бош вазир лавозимини эгаллаган биринчи аёл бўлган. «Совуқ уруш» даврида АҚШга эргашган, СССРни танқид қилган, касаба уюшмаларига қарши курашган аёлнинг исми Time журналининг «ХХ асрнинг энг машҳур одамлари» рўйхатидан ўрин олган. У 1951 йилда ҳарбий Денис Тэтчерга турмушга чиққан ва икки нафар фарзанд (бир қиз, бир ўғил) дунёга келтирган. Аммо уни шахсий ҳаётда сиёсий фаолиятидагичалик муваффақиятга эришган деб бўлмайди.

Ангела Меркель (66 ёш)

Фото: Grazia

Ангела Меркель 2005 йилдан бошлаб Германиянинг канцлери сифатида ишлаб келади ва у бу лавозимни эгаллаган илк аёл бўлган. Дунёнинг энг нуфузли кишиларидан бири деб эътироф этиладиган Ангела 1977 йилда Ульрих Меркелга турмушга чиққан ва 1982 йилда муносабатларига нуқта қўйган. 1998 йилда турмуш қурган Иоахим Зауэр билан эса 20 йилдан кўпроқ вақтдан буён бирга яшайди. Биринчи турмуш ўртоғидан эса фақатгина фамилия қолган, холос. У фарзандли бўлишни истагани, аммо ўхшамагани, сиёсат билан шуғулланишни бошлаганида 35 ёш бўлгани ва шундай кейин бу ҳақида ўйламаганини таъкидлайди.

Кондолиза Райс (66 ёш)

Фото: Grazia

АҚШнинг давлат котиби сифатида фаолият бошлаган Кондолиза ушбу лавозимида фаолият юритган илк қора танли аёл бўлган. Болалигида онаси уни мусиқа билан шуғулланишини истагани ва фортепиано чалишни ўргатганига қарамай, Райс кўпроқ сиёсатга қизиққан ва телевизордаги янгиликларни томоша қилишни яхши кўрган. Карьерасига муккасидан кетган аёл шахсий ҳаётига вақт ажрата олмаган ва турмушга чиқмаган. 2006 йил унинг ОАВда Канаданинг собиқ (2006—2007 йиллардаги) ташқи ишлар вазири Питер Маккей билан учрашиб юргани ҳақида тарқалган миш-мишлар ўз тасдиғини топмаган.

Ҳиллари Клинтон (73 ёш)

Фото: Grazia

АҚШнинг 67-давлат котиби сифатида фаолият юритган Ҳиллари 2016 йилги президентлик сайловида Трампга рақиб бўлган. Мактаб йилларидаёқ сиёсатчи ёки фазогир бўлишни орзу қилган Клинтон хоним қачонлардир коинотга учиш умидида NASA’га хат ёзган ҳатто. У политология бўйича бакалаврни битирган ва бўлажак турмуш ўртоғи Билл Клинтонни учратган. Фарзандли бўлганида ҳам севимли иши билан шуғулланишдан тўхтамаган ва умр йўлдошининг фаолиятини қўллаб-қувватлаган. Турли муаммоларга дуч келганига қарамай, жуфтлик ҳали ҳамон бирга.

Тереза Мэй (63 ёш)

Фото: Grazia

Буюк Британиянинг собиқ бош вазири Тереза дунёнинг энг нуфузли аёллари рўйхатидан бир неча марта ўрин олган. 1980 йилда Филипп Жон Мэйга турмушга чиққан Мей хоним фарзандли бўлмагани боисини саломатлигидаги муаммо билан боғлаган. Бу ҳақда гап кетганда у: «Ҳамма вақт бошқа оилаларни кузатиб, сизда йўқ нимадир уларда борлигини кўрасиз», — деган.