SpaceX ва Tesla компаниялари раҳбари Илон Маск NBC телеканалининг Saturday Night Live (SNL) скетч-шоусининг иккита проморолигида кўриниш берди, деб хабар қилади Esquire. Twitter фойдаланувчилари SNL постининг остида бизнесмен ниқоб ўрнига бандана тақиб чиққанини танқид қилмоқда.

Кадр: YouTube

Биринчи роликда Илон Маск 8 май куни Майли Сайрус билан шоу ўтказишини айтиб, бу ерда нима қилаётганини билмаслигини тан олган. «Яна шу ҳолат. Қоидалар? Йўқ, раҳмат», — дея унга қўшилади қўшиқчи. Бироқ SNL’нинг доимий актрисаси Сесили Стронг таклиф этилган бошловчиларга шанба — Оналар куни эканлиги ва дастурга уларнинг оналари ҳам ташриф буюришини эслатиб қўйган.

Кадр: YouTube

Иккинчи роликда Сайрус Маск ва Стронгдан ушбу ҳафта қандай ўтганини сўраган. Миллиардер ракеталарни муваффақиятли синовдан ўтказганини айтган бўлса, Стронг кийимларини ювганини маълум қилган.

Иккала роликда ҳам Илон Маскнинг ҳамбошловчиси Майли Сайрус ва SNL’нинг доимий актрисаси Сесили Стронг ниқобда, бизнесмен эса банданада кўриниш берган. Twitter фойдаланувчилари бандана чиройли кўринишини, бироқ у коронавирусдан яхши ҳимояламаслигини ёзмоқда. Улар Маскни актёрлар ва суратга олиш гуруҳининг хавфсизлиги ҳақида ўйламаётганликда айблаган. Бироқ энг эътиборли фойдаланувчилар Маскнинг қулоқларидаги боғичларни пайқаб қолган.

Saturday Night Live — 1975 йилдан буён NBC телеканали орқали эфирга узатилиб келинаётган мусиқий-кўнгилочар кўрсатув. Скетчларда мунтазам машҳур юлдузлар ва дастур актёрлари суратга тушади. Шоуда кўпинча америкалик ва дунёдаги етакчи сиёсатчиларга пародияларни кўриш мумкин.