Президент Шавкат Мирзиёев Самарқанд туманида барпо этилаётган туризм маркази қурилишини кўздан кечирди. Бу ҳақда Президент матбуот хизмати хабар қилди.

Фото: «Дарё» / Мадина Нурман

Ушбу мажмуа Самарқанд туманидаги эшкак эшиш канали бўйида, 212 гектар майдонда қурилмоқда. Лойиҳага кўра, бу ерда 10 та иншоот, жумладан, конгресс холл, меҳмонхоналар, дам олиш масканлари бўлади.

Айни пайтда конгресс холл, «Абадий шаҳар» карвонсаройи ва 8 та меҳмонхона бунёд этилмоқда. Меҳмонхоналарнинг иккитаси 22 қаватли, беш юлдузли, қолганлари тўрт юлдузли бўлади.

Фото: «Дарё» / Мадина Нурман

Маълумки, Самарқандда меҳмонхоналар кўп бўлишига қарамай, сайёҳлар кўп келганда ўринлар етишмай қолади. Масалан, 2019 йилда шаҳардаги барча отеллар банд бўлган.

Таъкидланишича, қурилаётган марказ туристик хабга айланади. Бу ерда халқаро анжуманлар ўтказиш учун ҳам кенг шароит бўлади. Уни 2022 йилда фойдаланишга топшириш мўлжалланган.

Фото: «Дарё» / Мадина Нурман

Президентга мазкур янги сайёҳлик маркази имкониятлари, туристларга кўрсатиладиган хизматлар ҳақида маълумот берилди. Давлат раҳбари марказ бошқарувини самарали ташкил этиш, туризм соҳасида мутахассислар тайёрлаш бўйича топшириқлар берди.

Шу ерда Самарқанднинг туризм инфратузилмасини ривожлантириш лойиҳалари тақдимот қилинди.

Фото: «Дарё» / Мадина Нурман

Самарқанд шаҳрида илк бор гастрономик кўча, Самарқанд тумани «Конигил» маҳалла фуқаролар йиғинида мамлакатдаги биринчи туризм қишлоғи ташкил этилди. Бундай масканлар сайёҳларнинг вилоятда қолиш вақтини узайтириш билан бирга, ҳудуд инфратузилмасини ривожлантириш, аҳолига даромад манбайи яратишда муҳим омил бўлмоқда.

Фото: «Дарё» / Мадина Нурман

Давлат раҳбари мазкур туристик марказни шаҳар билан боғлайдиган йўл ўтказгични бориб кўрди, Уста Умар Жўрақулов ва Афросиёб кўчаларида амалга оширилаётган ободонлаштириш ишларини кўздан кечирди.

Бундан аввал Шавкат Мирзиёев Самарқанд халқаро аэропортидаги қурилиш ишларини кўздан кечиргани, Ўзбекистон халқини Рамазон ойи билан табриклагани ҳамда Шавкат Мирзиёев Самарқанднинг Қорасув мавзесида қурилган кўп қаватли уйларни бориб кўргани ҳақида хабар қилинганди.