Тошкент шаҳридаги Аҳмад Дониш кўчасининг Юнусободга олиб борувчи 4,5 километрдан ортиқ бўлган қисми икки ойга ёпилади. Бу ҳақда пойтахт ҳокимлиги матбуот хизмати маълум қилди.
Хабар беришларича, Аҳмад Дониш кўчасининг Себзордаги Нурафшон айланма кўчасидан то Mega Planet савдо мажмуаси олдидан ўтган Янгишаҳар кўчасигача бўлган қисми «йўл-таъмирлаш ишлари туфайли» ёпилмоқда.
Қайд этишларича, бу вақт давомида «икки йўналиш ҳаракатланиши йўлнинг битта томони бўйлаб ташкил этилади». «Тирбандликларнинг олдини олиш учун ҳайдовчиларга айланма йўллардан фойдаланишни тавсия этамиз», — дейилади ҳокимлик ахборотида.
Маълумот учун, Аҳмад Дониш кўчасининг айрим қисмлари 2020 йил ноябридан бери тўла таъмирдан чиқарилди. Хусусан, ўтган йил декабрида кўчанинг Кичик ҳалқа йўли ва Уста Ширин кўчалари устидан ўтган кўприкли қисми таъмирдан чиққан бўлса, 2021 йилнинг дастлабки ойларида Амир Темур шоҳ кўчаси устидан ўтган йўл ўтказгич таъмирланиб, фойдаланишга топширилди.
Бундан аввалроқ, 2020 йил августида Аҳмад Дониш кўчасининг Mega Planet’дан то Тошкент автомобиль ҳалқа йўлигача бўлган, янги қурилган қисми фойдаланишга топширилган эди. Ҳозирда кўчанинг Амир Темур шоҳ кўчаси ва Анорзор/Мойқўрғон кўчалари оралиғидаги иккиламчи йўллари, шунингдек, Кичик ҳалқа йўли ва Боғиравон 2-тор кўчаси оралиғидаги иккиламчи йўллари таъмирланмоқда.
Таъкидлаш жоиз, шаҳар расмийлари Аҳмад Дониш кўчасининг айнан Нурафшон айланма кўчасидан то Янгишаҳар кўчасигача бўлган қисмини 2020 йилда тўлиқ таъмирдан чиқаришни режалаштирган эди. Режа бўйича, бутун кўча бўйлаб тротуарлар, велойўлаклар ва бекатлар ташкил этилиши кўзда тутилган, йўл ўртасидаги яшил ҳудуд эса 3 метрдан 5 метргача кенгайтирилиши режалаштирилган эди.
2020 йил январь ойида эълон қилинган дастлабки режа бўйича, Аҳмад Дониш кўчасининг ушбу 4,5 километрлик қисмини таъмирлаш учун 110 миллиард сўм ажратилиши керак эди.
Изоҳ (0)