«Бавария»нинг Чемпионлар Лигасидаги мағлубиятсиз серияси якунланди. Ханс Флик мусобақада илк бор ютқазди

«Бавария» Чемпионлар Лигаси чорак финал дастлабки баҳси доирасида 7 апрель куни ПСЖга қарши кечган баҳсда мағлубиятга учради (2:3).

Мюнхенликлар клуби Чемпионлар Лигасида 20 ўйин деганда илк бор ютқазди. Аввалроқ немис клуби 18 ўйинни ғалаба билан якунлаган ва битта дуранг қайд этганди. Сўнгги бор «Бавария» ушбу мусобақа доирасида 2019 йилнинг 13 мартида «Ливерпуль»га ютқазганди (1:3).

Бу «Бавария» устози Ханс-Дитер Флик учун ЕЧЛ доирасидаги илк мағлубият бўлди. Мутахассис 2020 йилнинг ноябрь ойида мюнхенликларни қабул қилиб олганидан кейин шу кунга қадар мусобақада 14 ғалаба ва бир дурангни ўз ҳисобига ёздириб қўйганди.

Шунингдек, «Бавария» барча мусобақаларни ҳисоблаганда 2019 йилнинг ноябридан кейин биринчи марта ўз уйида мағлуб бўлди. Ўшанда Мюнхен клуби Бундеслига ўйинида «Байер»га енгилганди (1:2).

ПСЖ ва «Бавария» жамоалари ўртасидаги жавоб ўйини 13 апрель куни бўлиб ўтади.