Наманганча мухлислик. «Навбаҳор» — «Пахтакор» ўйинидан кейин тартибсизликлар юзага келди, ЎзМТРКга тегишли автомобиль мухлислар «ҳужум»ига учради (видео)

Суперлига 5-тури доирасида ўтган 7 апрель кунги ўйинда «Навбаҳор» ўз майдонида «Пахтакор»га ютқазиб қўйди (1:2).

Учрашув якунланиб бораётган бир вақтда учрашув бош ҳаками видеотакрорлардан кейин наманганликлар дарвозаси томон пенальти белгилади. 11 метрлик жарима зарбасини Драган Черан голга айлантирди ва «шерлар»нинг ғалабасини таъминлади.

Ҳакамнинг ушбу қарори стадионга йиғилган томошабинларга ёқмади. Аввалига мухлислар ўйин тугаганидан кейин ҳакам кийиниш хонасига йўл олаётган вақтда турли буюмларни майдонга улоқтирган ҳолда ўз норозилигини билдирди.

Учрашув якунлангандан кейин ишқибозларнинг кўп қисми ўйингоҳ атрофида тўпланган ва ҳакамдан норозилигини намойиш қилган.

Шунингдек, мухлислар томонидан VAR мосламалари жойлаштирилган ЎзМТРК машинаси ўраб олинган. Фургоннинг ташқи томонига шикаст етказилган ва ён ойналари синдириб юборилган. Айрим маълумотларга кўра, «Пахтакор» вакилларига тегишли автомобилларга турли буюмлар улоқтирилган.

Аввалроқ ЎФА тартиб интизом қўмитаси «Навбаҳор» — «Насаф» учрашуви давомида наманганлик мухлислар ўз норозилигини қўпол тарзда намойиш этиб, «Насаф» футболчилари ва ўйин расмийлари томон майдонга турли буюмлар улоқтиргани учун Наманган клубига жарима солган ва бу ҳол қайтариладиган бўлса, уй учрашувларини мухлисларсиз ўтказиши ҳақида огоҳлантирилганди.

Шу тариқа «Навбаҳор» ўз мухлисларининг номақбул ҳаракатлари учун бу сафар жиддий жазо олиши мумкин.

Қайд этиш жоиз, «Навбаҳор» — «Пахтакор» учрашувини стадиондан бевосита 15 982 нафар томошабин кузатиб борган.

Эслатиб ўтамиз, мазкур учрашувни Фирдавс Норсафаров бошқариб борди, VAR тизимида эса Азиз Асимов ишлади.