Меган Маркл шов-шувли интервьюдан кейин ўзини сиёсатда синаб кўрмоқчи. Буни эшитган Трамп яна президентлик учун курашишини айтди

Шаҳзода Гаррининг рафиқаси Меган Марклнинг Британия қироллик оиласини ирқчиликда айблаб, Опра Уинфрига берган интервьюси атрофидаги шов-шувлар давом этмоқда. Энди Британия матбуоти Меганнинг сиёсий амбициялари ҳақида гапиришни бошлади. Гўёки, Марклнинг АҚШ президентларидан кам жойи йўқ, деб ёзади «Korrespondent.net».

Буюк Британия Лейбористлар партиясининг юқори амалдорларидан бири ва маъмурият фахрийси, Вашингтон билан мустаҳкам алоқа ўрнатган Тони Блэр Daily Mail’га берган интервьюсида Меган Марклнинг АҚШ президентлигига сайловолди кампанияси ва маблағ йиғиш гуруҳларини тузиш учун юқори мартабали демократлар билан боғланаётганини айтди.

«Сассекс герцогиняси бу масалада изоҳ беришдан бош тортди, аммо эр-хотин ўзларининг сиёсий қарашларини сир тутмайди. АҚШда 2020 йилги президентлик сайловлари чоғида жуфтлик Дональд Трампга кўринмас зарба бериб, сайловчиларни ‘нафратни қўзғатувчи нутқларни тингламасликка’ чақирганди, эр-хотиннинг вакили буни ‘одоб-ахлоққа чорлаш’ деб атаган», — дейилади Daily Mail хабарида.

«Блэр тарафдорлари, интернационалистлар ва Демократик тармоқлар орасида Меганнинг сиёсий амбициялари ва потенциал тарафдорлари ҳақида шов-шув пайдо бўлди», — деб ёзади Daily Mail.

Шу ўринда АҚШнинг 45-президенти Дональд Трамп агар Меган Маркл навбатдаги президентлик сайловларига номзодини қўйса, ўзининг «сайловларда қатнашишга кўпроқ мойил бўлишини» айтди.

«Умид қиламанки, бу (Меган Марклнинг сайловдаги иштироки) амалга ошади», — деди Трамп Fox News телеканалига берган интервьюсида. Унга кўра, Сассекс герцогинясининг сайловларда иштирок этиши Трампнинг сайловларда қатнашиш истагини кучайтиради.

Бироқ Трамп Марклнинг қирол оиласи ва Буюк Британия қироличаси Елизавета II ҳақидаги баёнотлари туфайли унинг «мухлиси»га айланмаганини таъкидлади. «Малика билан танишман деёлмайман. Қиролича билан кўришганман, у ажойиб аёл, аммо мен Меганнинг мухлиси эмасман», — деди Трамп.

Узоқ муддатли режалар

2020 йили Меганнинг дугонаси Vanity Fair журналига берган интервьюсида Меганнинг Британия қироллик оиласи аъзоси билан турмуш қурган пайт Америка фуқаролигидан воз кечмаганига сабаблардан бири бу унинг Вашингтон сиёсатида иштирок этиш имкониятини сақлаб қолиш эканини айтган.

Америкалик мутахассислар, агар АҚШда давлат лавозимини эгаллашни истаса, Марклнинг Сассекс герцогиняси унвонидан воз кечиши кераклигини таъкидлайди.

Тахминларга кўра, герцогиня 2024 йил 82 ёшга кирадиган президент Жо Байден иккинчи муддатга сайланишни хоҳлайдими ёки йўқлиги ҳақида ўйламоқда.

Ҳиллари ва Обаманинг изидан

Агар Меган Оқ уйга кирса, у АҚШнинг биринчи аёл президенти ва Барак Обамадан кейин Овал офиснинг иккинчи оқ танли бўлмаган эгаси бўлади.

Маркл, шунингдек, сиёсатга ўтишдан олдин 40 йил давомида Голливуд актёри бўлган президент Рональд Рейганнинг изидан юрган бўлади. Меганнинг дўстлари илгари унинг сиёсий амбициялари ҳақидаги миш-мишларни қўллаб-қувватлаб, уларни «Америка орзусини рўёбга чиқариш» деб таърифлаган.