Арманистон Қуролли кучлари бош штаби мамлакат бош вазири Никол Пашинян ва ҳукуматнинг зудлик билан истеъфога чиқишини талаб қилди. Бу ҳақда Meduza хабар берди.

Никол Пашинян

Фото: Reuters

Бош штаб Пашиняннинг таклифига биноан, Бош штаб бошлиғининг биринчи ўринбосари Тиран Хачатрян ишдан бўшатилгандан кейин шундай талаб билан баёнот берган. Баёнотга имзо чеккан 40 нафар юқори мартабали ҳарбий хизматчининг фикрича, Хачатрян «юзаки ўйланган ва асоссиз сабабларга кўра» ишдан бўшатилган.

Никол Пашинян ҳарбийларнинг баёнотига жавобан Facebook орқали мазкур баёнотни «ҳарбий тўнтаришга уриниш» деб ҳисоблаётганини маълум қилди. «Мен Еревандаги тарафдорларимизнинг барчасини Республика майдонига таклиф қилмоқчиман. Тез орада жонли эфир орқали жамоатчиликка мурожаат қиламан », — деди Пашинян.

Пашинян, шунингдек, ҳарбийлар баёнотига имзо чеккан Бош штаб бошлиғи Оник Гаспарянни ҳам лавозимидан озод қилганини айтди.

«Интерфакс»нинг хабар қилишича, Бош штаб баёнотидан сўнг, Ереван аҳолиси «Никол хоин!» ва «Никол йўқолсин» шиорлари билан бақириб, кўчаларга чиқа бошлади. Хусусан, одамлар мамлакат Мудофаа вазирлиги биносига йиғилмоқда.

Арманистон Мудофаа вазирлиги Бош штаб баёнотига ҳозирча изоҳ бермади

Маълумот учун Арманистон Қуролли кучлари Бош штаби бошлиғининг биринчи ўринбосари Тиран Хачатрян мамлакат бош вазири Никол Пашиняннинг таклифига биноан ишдан бўшатилган. Бунга Хачатрян бош вазирнинг Россияда ишлаб чиқарилган «Искандер» ракета комплексининг самарасизлиги ҳақидаги сўзларини танқид қилгани сабаб бўлган.

23 февраль куни Арманистон бош вазири 1in.аm каналига берган интервьюсида 2020 йилнинг кузида Тоғли Қорабоғдаги можаро пайтида Ереван қўллаган «Искандер» ракеталари «портламаган ёки 10 фоиз қисмигина портлаган»ини айтган. Ереван Today нашри журналистлари Тиран Хачатряндан ушбу баёнотга изоҳ беришни сўраганида у узоқ кулган ва «бўлиши мумкин эмас» деб жавоб берган.