Хоразмда вояга етмаган қизларни уйида сақлаб, уларни фоҳишалик қилишга мажбурлаб келган аёл қўлга олинди. Бу ҳақда ИИВ Транспортда хавфсизликни таъминлаш бош бошқармасига таяниб, «Yuz.uz» хабар берди.

Фото: «Yuz.uz»

Маълум қилинишича, 2 февраль куни Хоразм вилояти ИИБ ТХТБ бошлиғи номига Р.М. исмли аёл ёш, вояга етмаган қизларни уйида сақлаб, фоҳишалик билан шуғулланишга мажбурлаётгани тўғрисида ариза келиб тушган. Шунингдек, аризада у қизларни бир неча кунга бошқа вилоятларга 1000-1500 АҚШ долларига доимий равишда сотиб юбораётганлиги маълум қилинган.

Аризага мувофиқ тезкор тадбир ўтказилган. Тадбирда 1989 йилда туғилган, Урганч шаҳрида яшовчи Р.М. шартли харидор сифатида жалб қилинган М.М.га 2002- ва 1999 йилда туғилган икки қизни 7 кунга Самарқанд вилоятига фоҳишалик қилиб келиш учун 1400 доллар эвазига сотиб, Хазорасп бекатида М.М.дан пулларни олаётган вақтида қўлга олинган.

Мазкур ҳолат юзасидан фуқаро Р.М.га нисбатан Жиноят кодекснинг 135-моддаси (одам савдоси) 2-қисми «б» банди билан жиноят иши қўзғатилган. Ҳозирда тергов ҳаракатлари давом этмоқда.

Аввалроқ Тошкент халқаро аэропортида қизларни Туркияга фоҳишаликка юборгани учун 8 йилга қамалиб, афв этилган аёл яна шу жинояти учун ушлангани тўғрисида хабар берилганди.