Қозоғистонда коррупцияга оид жиноятларни аёллар кўпроқ содир эта бошлади

2020 йилда аёллар томонидан амалга оширилган коррупцияга оид жиноятлар кўпайди. Бу ҳақда Коррупцияга қарши кураш хизматининг махсус ишлар терговчиси Дониёр Бигайдаровга таяниб, Tengrinews хабар берди.

«2019 йилга солиштирсак, ўтган йил мобайнида аёллар томонидан содир этилган коррупцион жиноятлар сони ошди. 12 ой мобайнида Коррупцияга қарши кураш хизматида 336 нафар аёлга нисбатан 264 та иш очилди. 2019 йилда 328 та аёлга нисбатан 256 та иш очилган бўлса, 2020 йилда коррупцион жиноятларнинг 26,5 фоизини аёллар, 73,5 фоизини эркаклар содир этган. 2019 йилда эса аёллар 25, эркаклар 75 фоизни ташкил қилган эди», — дея маълумот берди Бигайдаров.

Унинг сўзларига кўра, аёлларнинг 202 нафари коррупцияга оид жиноий ҳуқуқбузарликлар, 134 нафари коррупцияга оид бўлмаган жиноий ҳуқуқбузарликлар учун судгача терговга жалб қилинган.

2020 йилда 228 нафар аёлга нисбатан жиноят ишлари судга оширилган. Коррупцияга оид ишлар бўйича 141 нафар аёл судланган, уларнинг 47 нафари озодликдан маҳрум қилинган, 30 нафарига озодликни чеклаш, 64 нафарига жарима жазоси белгиланган. 2019 йилда эса 27 нафар аёл озодликдан маҳрум қилиш, 44 нафарига озодликни чеклаш, 46 нафарига жарима белгиланган.