Халқ таълими тизимидаги барча туман ва шаҳар бўлимларига 2021 йилдан бошлаб ички аудиторлар бириктирилди. Бу ҳақда 1 февраль, душанба куни АОКАда бўлиб ўтган брифингда халқ таълими вазири ўринбосари Темур Комилов айтиб ўтди, дея хабар бермоқда «Дарё» мухбири.
Темур Комиловнинг маълум қилишича, Халқ таълими вазирлиги тизимида 2020 йилда қамраб олинмаган таҳдидли, хатарли ҳолатлар 2021 йилда жиддий ўрганилади.
«Қўпол бўлса ҳам айтай, мақсадимиз — тизимни қорадоғлардан, ҳовузни балчиқларидан тозалаб олганимиздан кейин яна уни балчиққа айлантирмаслик. Халқ таълими вазирининг буйруғи билан 2021 йилдан бошлаб республикадаги 205 та туман ва шаҳардаги қуйи тизим бўлимларига ички аудиторлар бириктирилди», — деди халқ таълими вазири ўринбосари. Унинг қўшимча қилишича, аудитор текширувлари ҳар чорак ва йил якунларида эълон қилиб борилади.
Унинг алоҳида таъкидлашича, тизимдаги ўғриликни камайтиш статистикани камайтириш дегани эмас. «Биз ўғриликни камайтирамиз деб, муросасиз курашга киришдикми, хоҳлаймизми-хоҳламаймизми бу статистика ошади», — деди Темур Комилов.
Мавзуга доир:
- Ўзбекистонда 9 ойда коррупцияга оид жиноятлар содир этган мансабдор шахслар ҳақидаги маълумот очиқланди
- Андижон шаҳар халқ таълими бўлимида 33,8 млрд сўм бюджет маблағларини ўзлаштириш ҳолатлари аниқланди
- Ўзбекистон халқ таълими тизимида 70 млрд сўмлик ўғрилик ва ўзлаштириш ҳолатлари аниқланди
- Молия вазирлиги 2020 йилда Ўзбекистонда энг кўп молиявий қонунбузилиш ҳолатлари қайси вазирликларда кузатилганини маълум қилди