БМТ бош котиби коронавирусга қарши эмланди

БМТ бош котиби Антониу Гутерриш коронавирус инфекциясига қарши эмланганини маълум қилди, деб хабар беради «РБК». Бу ҳақда у ўз Twitter’ида ёзди.

https://twitter.com/antonioguterres/status/1354899689682907138

«Бугун мен COVID-19’га қарши вакцинанинг биринчи дозасини олдим. Биз бутун дунёда одамларнинг вакцина олиш имкониятини таъминлаш устида ишлашимиз керак», — дея қайд этди у. Аммо айнан қайси компания вакцинасини олганига аниқлик киритмади.

2020 йил сентябрида Россия президенти Владимир Путин БМТ ходимларига Россиянинг «Спутник V» вакцинаси билан эмланишни таклиф қилган, дори бепул етказилишига ваъда берган эди. БМТ Путинга «сахий таклифи» учун миннатдорлик билдириб, уни ўрганиб кўришларини айтган эди.

Евроиттифоқда коронавирусга қарши эмлаш декабрь охирида бошланди. Айни пайтда у ерда регулятор томонидан маъқулланган иккита вакцина қўлланилмоқда. Булар Pfizer/BioNTech ва Moderna компаниялари томонидан ишлаб чиқилган вакциналардир.

Январь ўрталарида олтита Европа мамлакати Pfizer вакцинасини етказиб бериш билан боғлиқ муаммолардан шикоят қилди. Компанияда етказиб бериш ҳажмларининг пасайишини ишлаб чиқаришнинг қайта ташкил қилиниши билан изоҳлашди. Еврокомиссия раҳбари Урсула фон дер Ляйен Евроиттифоқ Pfizer билан келишилган вакцина партияларининг барчасини март охиригача қабул қилиб олишини айтди.