Тошкентда жамоат жойларида совуқ қурол олиб юрган фуқароларга нисбатан чора кўрилди, дея хабар бермоқда шаҳар ИИББ.

Фото: Тошкент шаҳар ИИББ

Таъкидланишича, 2021 йилнинг бошидан буён Тошкент шаҳар ИИББ ходимлари фуқароларда совуқ қурол ва бошқа буюмлар топилиши билан боғлиқ 655 та фактни аниқлади. Натижада Тошкент шаҳар ИИББ ходимлари ва Миллий гвардия хизматчилари томонидан текширувлар давомида 567 та пичоқ, 3 та болта, 11 та кастет, 34 та бита ва бошқа буюмлар топилди.

Фуқароларга нисбатан Маъмурий жавобгарлик тўғрисидаги кодексининг 185-2 (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) моддаси бўйича тегишли баённомалар расмийлаштирилди.

Шунингдек, ўқув даргоҳларида ўтказилган текширувлар давомида ўқувчилардан 25 та пичоқ, 7 та кастет ва бошқа хавфли буюмлар топилди. Ўсмирларнинг ота-оналари билан суҳбатлар ўтказилди, уларнинг баъзиларига нисбатан Маъмурий жавобгарлик тўғрисидаги кодексининг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) бўйича баённомалар расмийлаштирилди.

Бошқарма совуқ қурол сифатида фойдаланилиши мумкин бўлган ашёларни улардан касбий фаолиятда, спорт фаолиятида ёки хўжалик-маиший мақсадларда фойдаланиш билан боғлиқ бўлган ҳолларда, жамоат жойларида очиқ (ғилофсиз) ҳолда олиб юриш — базавий ҳисоблаш миқдорининг иккидан бир қисмидан бир бараваригача миқдорда жарима солишга сабаб бўлишини эслатиб ўтган.

Аввалроқ Бекободда маст эркак у билан саломлашмаган танишига пичоқ ургани, «Малика»да икки йигитнинг жанжали пичоқбозлик билан тугагани ҳамда Тошкентда совуқ қурол олиб юриш учун жавобгарлик белгиланган кундан бошлаб қанча баённома расмийлаштирилгани маълум қилингани ҳақида хабар қилинганди.