Италиянинг Монтикяри шаҳридаги касалхонанинг шошилинч тиббий ёрдам бўлими бошлиғи Карло Моска койкаларни бўшатиш учун коронавирус билан касалланганларни ўлдирганликда гумон қилинди. Бу ҳақда La Repubblica хабар бермоқда
Фото: Shutterstock
Нашрнинг ёзишича, 47 ёшли шифокор яқин вақтгача қаҳрамон ҳисоблаб келинган. Чунки у тун-у кун коронавирусга чалинган беморларни даволаш билан шуғулланган. Ўтган йилнинг баҳорида Италия COVID-19 тарқалиши бўйича дунёда етакчи бўлган пайтда Моска беморлар ҳаётини сақлаб қолиш билан банд бўлиб, оила аъзоларини 2 ой давомида кўрмаган. Энди эса уни «ўлим шифокори» деб аташмоқда.
Моска ишлаган клиника ҳамшираларининг айтишича, коронавирусни даволаш протоколига киритилмаган бўлса-да, шифокор кучли таъсир этувчи препаратлар олиб келишни тез-тез талаб қилган. Бундан ташқари, у оғир беморлар билан холи қолдиришни сўраган ва бу ҳам унга бўлган шубҳаларни оширган.
Шифокор ҳаракати оқибатида беморларнинг икки нафари вафот этгани маълум. Хусусан, Италия прокуратураси маълумотларига кўра, март ойида Моска 61 ёшли Басси ва 80 ёшли Анжело Палеттига кучли таъсир этувчи анестезик — пропафолнинг катта дозасини берган. Айни пайтда ҳуқуқ-тартибот ходимлари унинг Ломбардия касалхонасидаги 4 та ўлим ҳолатига алоқадорлигини текширмоқда.
Шифокор нима мақсадда бундай йўл тутгани номаълум. Ҳамкасбларининг фикрича, шифокор пандемия шароитида иш оғирлашганидан ақлдан озган. Бироқ полиция янги беморларга жой бўшатиш учун заиф бўлган касаллардан халос бўлган, деб тахмин қилмоқда.
Полиция беморлар ўлими ва мижозлар касаллик варақасидаги ёзувларни сохталаштиришда гумон қилиб шифокорни ҳибсга олган. Шифокорнинг ўзи эса бу айбловларни тан олмаяпти.
Жонс Ҳопкинс университети маълумотларига кўра, Италияда пандемия бошидан буён 2,4 миллиондан ортиқ киши коронавирусга чалингани қайд этилган, уларнинг 86 мингдан ортиғи вафот этган. Мамлакат касалликка чалинганлар сони бўйича дунёда саккизинчи ўринда.
