Қарши шаҳрида фуқарони пул эвазига Миллий гвардия тизимига ишга киритиб қўймоқчи бўлган шахсга жиноят иши қўзғатилди. Бу ҳақда «Дарё»га Бош прокуратура матбуот хизмати хабар берди.

Маълум бўлишича, М.Т. фуқаро Р.С.нинг ишончига кириб, уни юқори лавозимда ишловчи танишлари орқали Миллий гвардия тизимига ишга жойлаштириб қўйиш эвазига 4500 доллар сўраган.

Пулни фирибгарлик йўли билан олган вақтида Департаментнинг Қарши шаҳар бўлими томонидан Қарши ҳарбий прокуратураси ва Миллий гвардия ходимлари билан ҳамкорликда ўтказилган тезкор тадбирда ашёвий далил билан ушланган.

Ҳолат юзасидан М.Т.га нисбатан Жиноят кодексининг 168-моддаси (фирибгарлик) 2-қисми ва 28,211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Қаршида металл заводига ишга киритиб қўйиш учун 80 000 доллар сўраган шахс қўлга олингани ҳақида хабар берилган эди.