Фарғона вилоятининг Ёзёвон туманида 10-синф ўқувчиси сувга чўкиб ўлгани тахмин қилинмоқда, дея хабар берди «Дарё» мухбири.
Таъкидланишича, Ёзёвон туманининг «Тараққиёт» маҳалласи Бўтқачи қишлоғида яшаган 16 ёшли А.А. қишлоқ ҳудудидан оқиб ўтувчи Катта Фарғона каналига ўзини ташлаб, қайтиб чиқмаган.
Айни вақтда вилоят Фавқулодда вазиятлар бошқармасининг минтақавий қутқарув отряди томонидан ҳодиса содир бўлган жой ва ундан беш километр узоқликдаги масофа оралиғида қидирув ишлари олиб борилмоқда. Қарийб ўн беш кундан буён юзлаб одамлар кўнгилли тарзда марҳумнинг жасадини излашга киришган.
«Дарё» мухбири билан суҳбатлашган қишлоқ аҳлининг айтишича, марҳумнинг отаси Абдуҳошим Эргашев икки йилдан буён Россияда ишлаб келган. Ўзбекистонга қайтган куни эса ушбу бахтсиз ҳодисанинг устидан чиққан.
«Ўша куни Россиядан келдим, самолётимиз Ўшга қўнди. Чегарадан Ўзбекистонга ўтиб, машина гаплашдим. Кейин уйдагиларга телефон қилиб, шу хабарни эшитдим. Ўзбекистонга қадам қўйган куним шу ҳолат бўлибди. Бу иш ҳеч кимнинг бошига тушмасин. Яратган катта синов берди. Ёлғиз ўғлим бор эди. Шу боламнинг жасадини бир марта бўлса ҳам бағримга босиб, амалларини бажариб, тупроққа қўяй. Бўлди, шу холос, бошқа ҳеч нарса керак эмас менга.
Ҳоким, прокурор, ички ишлар, ҳаммаси ёрдам беряпти. ‘МЧС’ ходимлари ҳам шу ерда. Каналнинг сувини шунчалик тушириб беришди, раҳмат. Барибир бу сув кўп-да. Қиш кунларида қийин бўляпти. Шу сувни яна озгина тушириб беришсин», — дейди Абдуҳошим Эргашев.
Ёзёвон туман ИББ бошлиғи Ҳожиакбар Тошпўлатовнинг маълум қилишича, каналга чўкиб кетгани тахмин қилинаётган фуқарога нисбатан қидирув эълон қилинган. Жасадни сувдан қидириб топиш чоралари кўрилмоқда. Ҳозирда ҳолат юзасидан суриштирув ишлари олиб борилмоқда.
Изоҳ (0)