Президент Шавкат Мирзиёев 29 декабрь куни Олий Мажлисга йўллаган Мурожаатномасида ислоҳотларнинг устувор йўналишларидан бири аёлларнинг давлат ва жамоат бошқарувидаги ролини янада ошириш эканлигини айтиб ўтди.
Фото: «Дарё»
Давлат раҳбари ҳозирги пайтда масъул идоралар, банклар ва ҳокимликлар Касаба уюшмалари федерацияси бошчилигида олти миллиондан зиёд аёлларнинг уйларига ташриф буюриш орқали муаммоларини ўрганаётганини таъкидлаган.
«Аччиқ бўлса ҳам тўғрисини тан олиб айтиш керак, бу ўрганишларимиз натижасида биринчи марта жойлардаги аёлларимиз дард-у ҳасратларига тўла бўлган адолатли ҳақиқат юзага келди. Шу асосда ‘аёллар дафтари’ шакллантирилмоқда. Уларни қийнаётган кўплаб ижтимоий-иқтисодий муаммоларга амалий ечим топилмоқда. Бу ишларга маҳаллаларда янги ташкил этилаётган Аёллар маслаҳат кенгашлари ҳам яқиндан кўмак бермоқда», — деб қайд этган Президент ва бу ушбу йўналишдаги муаммоларни ҳал қилиш йўлидаги ишларнинг фақат бошланиши эканлигини қўшимча қилган.
«Мамлакатда яшовчи 17 миллиондан зиёд аёллар — қизларимиз, оналаримиз ва бувиларимиз учун муносиб турмуш шароитларини яратиш учун қўлимиздан келган барча ишни амалга оширишимиз лозим», — деган Шавкат Мирзиёев.
Давлат раҳбари хотин-қизларнинг жамият ҳаётидаги ўрни ва нуфузини ошириш, уларга янги имкониятлар яратиш бўйича навбатдаги қадам сифатида «ҳаётни ва аёллар муаммоларини яхши биладиган, фаол ва ташаббускор аёллардан иборат» Республика хотин-қизлар жамоатчилик кенгашини ташкил этишни таклиф қилди.
«Кенгашга бу борада катта тажрибага эга бўлган Сенат раиси Танзила Норбоевага раҳбарлик қилишни таклиф қилсам, барчангиз мени қўллаб-қувватлайсиз деб ўйлайман», — деган давлат раҳбари.
Президент хотин-қизларни қўллаб-қувватлаш бўйича республика ва ҳудудий жамғармаларни янги ташкил этилаётган кенгашларга ўтказишни таклиф қилди.
Мурожаатномада, шунингдек, аёлларнинг бизнес лойиҳаларини қўллаб-қувватлаш ҳамда жойларда аниқланган хотин-қизлар муаммоларини ҳал қилиш учун бюджетдан қўшимча равишда 1 триллион сўмдан ортиқ маблағ ажратилиши айтилди.
Бунинг учун «Халқ банки» томонидан жойларда хотин-қизларни тадбиркорликка ўқитиш намунавий бизнес режаларни ишлаб чиқиш ва кредит олишда уларга ёрдам кўрсатишда янги тизим жорий этилади.
