Самарқандда аҳоли хонадонларида 30 дан ортиқ газ тортиш қурилмаси ноқонуний ўрнатилгани маълум бўлди

Самарқанд шаҳрида ўтказилган рейд тадбирларида газ тақсимловчи ГРПлар ҳамда аҳоли хонадонларида ноқонуний равишда ўрнатилган 30 дан ортиқ газ тортиш қурилмалари борлиги аниқланди. Бу ҳақда «Дарё»га Самарқанд шаҳар ҳокимлиги ахборот хизмати маълум қилди.

Маълум қилинишича, Самарқанд шаҳар ҳокимлиги, шаҳар ИИБ, Фавқулодда вазиятлар бўлими, электр тармоқлари корхонаси ва шаҳар газ таъминоти бўлими ходимларидан иборат ишчи гуруҳ ташкил этилиб, «Хўжа Аҳрор Валий», «Сўзангарон», «Намозгоҳ», «Садриддин Айний», «Мирзо Улуғбек», «Кўл» ва бошқа маҳаллаларда назорат тадбирлари ўтказилган.

Ўрганишлар жараёнида маълум бўлишича, айрим истеъмолчиларнинг ўзбошимчалик билан ноқонуний газ тортиш насослари ўрнатиши газ босимининг бузилишига, белгиланган ҳудудларга газ етиб бормаслигига сабаб бўлган.

Икки кун давом этган рейд давомида 30 дан ортиқ хонадондаги газ тортиш қурилмалари олиб ташланган. Газдан ноқонуний фойдаланган фуқароларга белгиланган тартибда чора кўриш бўйича ҳуқуқни муҳофаза қилиш органларига хабар берилган.