Туркия президенти Ражаб Тоййиб Эрдўғон Янги йил байрамлари даврида — 31 декабрь куни соат 21:00 дан 4 январь соат 05:00 га қадар мамлакатда комендантлик соати амал қилишини эълон қилди, деб ёзади Meduza.

Фото: «Дарё» / Мадина Нурман

«Биз аввалроқ кўрган чора-тадбирлар шарофати билан COVID-19’га алоқадор беморлар ва ўлимлар сони бошқа мамлакатлардагига нисбатан жиддий равишда пасаяётганини кузатяпмиз», — деди Эрдўғон.

Туркияда 21 ноябрдан дам олиш комендантлик соати амал қилиб келмоқда. Дастлаб чекловлар фақат кечки ва тунги вақтларга тааллуқли эди, аммо 30 ноябрдан кеча-ю кундуз амал қилмоқда. Қоидабузарлар жаримага тортилади.

Дам олиш кунлари комендантлик соати эълон қилинганидан кейин Туркия ИИВ бу чоралар сайёҳлар учун амал қилмаслигини билдирди. Янги йил байрамларида сайёҳлар комендантлик соатига риоя қилмаслигига рухсат этиладими-йўқми — бунга мамлакат ҳукумати аниқлик киритганича йўқ.

Туркия ҳукумати мамлакатда бир кеча-кундузда 229 киши коронавирусдан вафот этганидан кейин Янги йил байрамлари давридаги комендантлик соати ҳақида эълон қилди — бу бутун пандемия давридаги энг юқори кўрсаткичдир.

Пандемия бошидан буён Туркияда 1,8 миллиондан ортиқ киши коронавирусга чалинган. Айни пайтда мамлакатда 216 минг киши касалликни бошидан ўтказмоқда, яна 16 минг киши вафот этган, 1,6 миллиондан зиёд одам эса соғайган.