Муайтай бўйича ўзбекистонлик Жаҳон чемпиони Анвар Бойназаров 13 декабрь тонгида MMA’даги дебютини ўтказади

Тошкент вақти билан 13 декабрь тонгида АҚШнинг Таллаҳасси шаҳрида Combat Night Pro промоушени томонидан ўтказилаётган MMA мусобақаси бўлиб ўтади.

Унда ўзбекистонлик яккакурашчи Анвар Бойназаров профессионал MMA’даги дебют жангини ўтказади. 31 ёшли Бойназаровга америкалик жангчи Ҳенри Ли Крапп рақиб бўлади. 21 ёшли спортчи профессионал боксда иккита жанг ўтказиб, уларни иккисини ҳам бой берган ва бу унинг учун ҳам MMA’даги дебют бўлади.

Combat Night Pro 19 мусобақаси Тошкент вақти билан 07:00 да бошланади.

Анвар Бойназаров иштирокидаги жангни бу ерда кузатиб бориш мумкин — ҳавола

Маълумот учун, Анвар Бойназаров 1989 йилнинг 10 январь куни Самарқанднинг Жомбой туманида туғилган. 12 ёшидан бошлаб таэквондо билан шуғулланган. У профессионал фаолиятини ривожлантириш учун 2008 йил Таиланд пойтахти Бангкокка жўнаб кетган. «The Uzbek» лақаби билан машҳур бўлган Бойназаров муайтай бўйича аввалига ҳаваскорлар ўртасида Жаҳон чемпиони бўлди, 2011 йилда эса WMF йўналиши бўйича Жаҳон чемпиони бўлди. Фаолиятининг маълум қисмида 5 йил ичида 111 та жангда иштирок этиб, ўзига хос рекорд ўрнатганди.