iPhone қурилмалари қуввати тез тугаб қоляпти. Бунга iOS 14.2 айбдор

2020 йилнинг октябрь ойида тақдим этилган янги iPhone 12 смартфонининг фойдаланувчилари гаджет экрани блокланган ҳолатда ҳам қуввати тез тугаётганидан шикоят қилишни бошлагани тўғрисида хабар берилганди. Reddit фойдаланувчиларининг таъкидланишича, мазкур муаммоларнинг юзага келишига iOS 14.2 сабаб бўлмоқда, деб ёзади Hi-Tech.Mail.ru.

Муаммога дуч келганларнинг деярли барчаси бир хил сценарий ҳақида гапирмоқда — аккумулятор қуввати тезроқ тугаб, қувват олиши секинлашган. Ҳатто айрим ҳолатларда смартфоннинг 50 фоиз қуввати ярим соатда тугаб қолмоқда.

MacRumors нашрининг ёзишича, бу iOS 14.2’га боғлиқ, чунки муаммо тизимнинг ушбу версияси тақдим этилганидан сўнг, дарҳол пайдо бўлган. Афтидан, автономликнинг камайиши биринчи навбатда эски, хусусан, iPhone ХS’дан iPhone 6S’га қадар бўлган моделларга тегишли. iPhone 12 эгалари ҳам бу каби муаммолардан шикоят қиляпти.

Таъкидланишича, янгиланган iOS 14.2.1 ушбу муаммони ҳал этмайди. Бироқ ҳозирда iOS 14.3’нинг очиқ бета-тестлари ўтказилмоқда — унда эҳтимол, муаммо бартараф этилган. Apple’нинг ўзи эса фойдаланувчиларнинг шикоятига бирор изоҳ бермаган.