Artificial Intelligence Journey онлайн конференцияси пайтида «Афина» виртуал ёрдамчиси Россия президентидан сунъий интеллект президент бўладими ёки йўқми, деб сўради. Бу ҳақда «Korrespondent.net» хабар берди.

Фото: EPA

Владимир Путин бунга жавобан: «Умид қилманки, йўқ. Ҳар ҳолда, ҳозирча», — деб жавоб берди.

Унинг таъкидлашича, сунъий интеллектда юрак, қалб, раҳм-шафқат ва виждон йўқ. «Бу нарсаларнинг барчаси фуқаролар томонидан мамлакатга фойда келтирадиган қарорларни қабул қилиш ва амалга ошириш ваколати берилган одамлар учун жуда муҳимдир», — деди Россия президенти.

«Хусусан, президентлар бир қарашда мутлақо оқилона бўлмаган қарорларни қабул қилишга мажбур бўлади. Улар тарих, маданият, жорий амалиёт, мамлакат фуқароларининг интилишлари ва умидлари асосида қабул қилиниши керак. Ижтимоий соҳа учун бу қарорлар баъзан пенсия, соғлиқни сақлаш ва инсон ҳаётининг бошқа соҳаларида мантиқсиз бўлиб туюлади», — деди Путин.

«Одам президент учун мазкур қарорлар оқилона кўринади ва ҳисобланади, чунки у қарорни машиналар манфаати учун эмас, балки тирик одамлар манфаати учун қабул қилади», — деб таъкидлади Россия президенти.

Шу билан бирга, Путин сунъий интеллектнинг давлат бошқарувидаги ўрни ошишига ишонади.