Қирғизистон ўз ҳудудига барча мамлакатлар фуқаролари учун кириш ҳуқуқини берди, деб хабар берди мамлакат Ташқи ишлар вазирлиги.

Фото: Қирғизистон Соғлиқни сақлаш вазирлиги

Маълум қилинишича, Қирғизистон ҳукумати 2020 йил 4 декабрда Манас, Ўш, Иссиқкўл халқаро аэропортлари орқали Қирғизистонга келган хорижий давлат фуқаролари ва фуқаролиги бўлмаган шахсларни мамлакатга қабул қилишни қайта тиклаш тўғрисида қарор қабул қилди.

Унга кўра, хорижий давлатларнинг фуқаролари ва фуқаролиги бўлмаган шахслар сўнгги 72 соат ичида ПЦР усулида топширилган, манфий натижадаги коронавирус тест таҳлили тақдим этилгандан кейингина Қирғизистонга йўналтирилган самолёт бортига чиқишига рухсат этилади.

Қирғизистонга етиб келганидан сўнг санитария-карантин пунктлари ходимлари ПЦР тести натижалари ва самолёт бортидаги йўловчиларнинг тана ҳароратини текширади.

Коронавируснинг биринчи ҳолатлари Қирғизистонда март ойида аниқланган, шу ойда республика ўз чегараларини чет элликлар ва фуқаролиги бўлмаган шахслар учун ёпган. Кейинчалик нисбатан барқарор эпидемиологик вазиятга эга бўлган бир қатор давлатларнинг фуқароларига мамлакатга кириш ҳуқуқи берилди.

Жонс Ҳопкинс университети маълумотларига кўра, Қирғизистонда коронавирус билан касалланганлар сони 74 744 кишини ташкил қилмоқда. Уларнинг 1290 нафари вафот этган.

Аввалроқ Ўзбекистон Қирғизистонга яна 200 ўринга мўлжалланган тиббиёт контейнерларини етказиб бергани, Россия Қирғизистонга молиявий ёрдамни қайта тиклагани ҳамда Қирғизистон Парламенти спикери шифокорлар статистика учун COVID-19’дан ўлимлар сонини яширганини ошкор этгани ҳақида хабар берилганди.