Литвадаги фермада коронавирус тарқалгани сабабли 40 мингта қоракўзан йўқ қилинади

Литванинг Йонав туманидаги қоракўзанлар етиштирувчи Danmink фермаси коронавирус тарқалишини тўхтатиш учун тахминан 40 мингта қоракўзанни йўқ қилади. Бу ҳақда «Интерфакс» хабар берди.

Литванинг Давлат озиқ-овқат ва ветеринария хизмати маълумотларига кўра, фермада ўтган ҳафтадан буён коронавирус билан касалланган 1,2 мингдан ортиқ қоракўзан нобуд бўлган, яна 600 та қўракўзан йўқ қилинган. Йонав туманида 30 ноябрдан бошлаб экстремал ҳолат жорий қилинган. Бу ҳолат корхоналарга йўқ қилинган қоракўзанлар учун товон тўлашга имкон беради.

Туман масъулларининг маълум қилишича, ҳозирча қоракўзан фермаларида коронавирус тарқалишининг олдини олиш бўйича аниқ схема мавжуд эмас. Бу Литвадаги биринчи ҳолат ҳисобланади, шу сабабли расмийлар вирус ва унинг ҳайвонлар орасида тарқалиши ҳақида иложи борича кўпроқ маълумот тўплашга уринмоқда.

Қайд этилишича, экстремал ҳолат аҳолига тааллуқли эмас, барча чоралар коронавирус аниқланган хўжаликларга қаратилган.

Давлат озиқ-овқат ва ветеринария хизмати маълумотларига кўра, фермада коронавирус аниқланган вақтда у ерда 59 мингдан ортиқ қоракўзан сақланаётганди. 40 мингта қоракўзан йўқ қилинганидан кейин қолганлари кейинчалик уларни етиштиришни давом эттириш учун сақлаб қолинади.

Danmink фермасининг тўрт нафар ишчисида коронавирус аниқланган, яна бир неча киши карантинга олинган.

Ўтган ҳафтада Радвилишкис туманидаги яна бир қоракўзан фермасининг икки нафар ишчисида коронавирус аниқланган. Фермадаги барча 50 мингта қоракўзан 27 ноябрда йўқ қилинган, бироқ бу вирус сабабли эмас, балки қоракўзанларнинг маълум ёшга етганлиги сабабли амалга оширилган ва бу одатий технологик жараён ҳисобланади.

Дастлаб Дания, кейинроқ Испания, Италия, АҚШ, Нидерландия, Швеция ва Грецияда қоракўзанларда коронавирус аниқлангач, Литвада профилактика мақсадида қоракўзанлар коронавирусга текширилган.

Дания ҳукумати ноябрь ойининг бошида коронавирус қоракўзанларда мутацияга учраганини ва мазкур мутация келажакдаги COVID-19’га қарши ҳар қандай вакцинанинг кучини йўққа чиқариши мумкинлигини маълум қилганди.

Давлат озиқ-овқат ва ветеринария хизмати маълумотларига кўра, айни пайтда Литвадаги 86 та фермада 1,6 миллионта қоракўзан сақланмоқда.

Эслатиб ўтамиз, 4 ноябрь куни Дания ҳукумати ҳайвонларда коронавирус инфекциясини келтириб чиқарадиган SARS-CoV-2 вируси мутациясига учраганидан кейин мамлакатдаги барча фермер хўжаликларида қоракўзанлар йўқ қилинишини маълум қилди. Даниядаги фермаларда коронавирус билан касалланган барча қоракўзанлар йўқ қилиниши ортидан мамлакат озиқ-овқат, қишлоқ хўжалиги ва балиқ хўжалиги вазири Могенс Йенсен ўз лавозимини тарк этишини эълон қилди. Аввалроқ у баъзи фермер хўжаликларида ҳайвонларда коронавирус мутацияси аниқланганлиги сабабли мамлакатда етиштирилган қоракўзанларни йўқ қилиш тўғрисидаги қарор нотўғри бўлганлигини тан олганди.