АҚШда Chevrolet пикапи базасида яратилган йўлтанламас лимузин сотувга қўйилди (фото)

АҚШнинг Айова штатида 1996 йилги Chevrolet Silverado пикапи платформасида яратилган йўлтанламас лимузин сотувга қўйилди. Базмларга миниб бориш учун мўлжалланган автомобиль 185 минг километр йўл босган бўлиб, уни 17 минг доллар эвазига харид қилиш мумкин, деб ёзади Motor.

Лимузин Chevrolet Silverado базасида яратилган. Сотувчининг сўзларига кўра, 1990 йилларда пикапнинг кузови иккига бўлинган, автомобилга қўшимга ўқ ўрнатилган ва «подвеска»си модификация қилинган. Йўлтанламас лимузин салонига 12 киши сиға олади.

Лимузиннинг ичида турли базмларни ўтказиш учун барча зарурий нарсалар мавжуд. Автомобильга чарм билан қопланган учта диван, телевизор, шунингдек, мини-бар ва қўшимча аудиотизим ўрнатилган. Бундан ташқари, салондан тўғри юк бўлмасига ҳам ўтиш мумкин.

Йўлтанламас лимузин капоти остидан 190 от кучи ва 525 Нм айланувчи моментга эга 6,5 литрли Detroit Diesel V8 ўрин олган. Дизелли агрегат тўрт поғонали автоматик узатмалар қутиси билан биргаликда ишлайди. Бундан ташқари, автомобиль тўлиқ узатмага улана оладиган тизим билан жиҳозланган.

Модификацияга учраган ушбу автомобиль яратилганига 24 йил бўлганига қарамай, у 185 минг километргина йўл босган. Сотувчи ундан 17 минг доллар эвасига «ажралиш»га тайёр.

Эслатиб ўтамиз, сентябрь охирларида Колорадо штатида Chevrolet Silverado пикапи базасида яратилган ноодатий лимузин сотувга қўйилган эди.