Россиянинг «Лукойл» компанияси Ўзбекистонда газ қазиб олиш бўйича ишларини деярли лойиҳадаги даражага қадар қайта тиклади. Бу ҳақда компаниянинг молиявий масалалар бўйича вице-президенти Павел Ждановга таяниб, Spot хабар берди.

Фото: Sputnik

«Лойиҳаларимиз бўйича экспорт таъминоти қайта тикланди ва сентябрь ойида ишлаб чиқаришни босқичма-босқич тиклаш бошланди. Айни вақтда суткалик қазиб олиш ишлари деярли тўлиқ лойиҳа даражасига қадар тикланган», — дейди Жданов Ўзбекистонда газ қазиб олиш ҳақида гапираркан.

Унинг сўзларига кўра, компания 2020 йилда Ўзбекистонда ишлаб чиқарилган газни ички бозорга етказиб бериш бўйича дастлабки келишувларга эришган.

Эслатиб ўтамиз, 2019 йилнинг мартида «Лукойл» томонидан ички бозорга йилига 5 миллиард куб метр миқдоридаги газни олдиндан тўлов асосида ўртача ҳисобланган экспорт нетбекига нисбатан 12,5 фоизлик чегирма билан етказиб бериш тўғрисидаги келишувга эришилгани маълум қилинганди.

2020 йилнинг октябрида ўтказилган йиғилишда Президент Шавкат Мирзиёев табиий газ қазиб олишни кўпайтириш ва ички бозорга қўшимча газ етказиб бериш бўйича топшириқлар берганди. Бунда йилнинг ўтган тўққиз ойида газ қазиб чиқариш деярли 20 фоизга камайган, яъни 44,8 миллиарддан 36 миллиард кубометргача. Газ конденсати эса 35 фоизга ёки 1,5 миллион тоннадан 1 миллион тоннагача камайган.

2020 йилнинг июлида «Лукойл» компанияси коронавирус сабаб Хитойда газга бўлган талаб камайиб кетгани боис Ўзбекистонда газ қазиб олишни лойиҳа қувватидан 40 фоизга қисқартиргани маълум қилинганди. Натижада компания газни ички бозорга йўналтириш бўйича Ўзбекистон билан келишувга эришди.