Ўзбекистон иккинчи марта суверен халқаро облигацияларни чиқариши ҳақида аввалроқ хабар берилганди. Умумий қиймати 750 миллион доллар бўлган доллар ва ўзбек сўмида деноминация қилинган халқаро облигациялар Лондон фонд биржасига жойлаштирилди.

Фото: «Дарё»

Bloomberg агентлиги ушбу тадбирни ёритган ҳолда бунга АҚШдаги президентлик сайлови қисман ёрдам берган бўлиши мумкинлигини таъкидлади. Агентликнинг қайд этишича, Жо Байденнинг ғалабаси ва коронавирусга қарши вакцина яратилишидаги ютуқлар ҳақидаги маълумотлар инвесторларнинг хатарли активларга бўлган қизиқишини орттирди, Ўзбекистон эса бу вазиятдан фойдаланишга қарор қилди.

«Ўзбекистон бу йил иқтисодий ўсишни намойиш этган кам сонли давлатлардан бирига айланиши мумкин», — деб таъкидлайди Bloomberg.

Фото: Bloomberg

Агентлик таҳлилчиларининг фикрига кўра, рейтинги инвестиция даражасидан уч поғона пастда бўлган Ўзбекистонда евробондлар туфайли иқтисодий вазиятни яхшилаш учун барча имкониятлар мавжуд — Байден ғалаба қозонганлиги ҳақидаги хабардан сўнг инвесторлар яна ривожланаётган бозорларга эътибор қаратди ва ушбу евроблигацияларга сармоя киритишга тайёр.

«Ренессанс Капитал» вакили София Донецнинг фикрига кўра, Ўзбекистон коронавирусга қарши минтақадаги қўшниларига қараганда яхшироқ кураша олди ва 2020 йилда иқтисодий пасайишнинг олдини олишга муваффақ бўлган кам сонли давлатлардан бирига айланди.

Ўзбекистоннинг биринчи евробондлари 2019 йил февраль ойида жойлаштирилганди. Иккинчи жойлаштиришда иштирок этишни режалаштирган Берлиндаги Capitulum Asset Management GmbH компаниясининг инвестиция бўйича бош директори Луц Ремеернинг сўзларига кўра, биринчи жойлаштириш яхши ўтганди, чунки инвесторларни мамлакатнинг паст қарз даражаси жалб қилган.

Эслатиб ўтамиз, Ўзбекистон ҳукумати 17 ноябрдан бошлаб АҚШ, Буюк Британия, Дания, Австралия ва БААдан бўлган қарийб 90 нафар инвестор билан аудиоконференциялар ўтказган.

Молия вазирлиги маълумотларига кўра, долларда деноминация қилинган траншнинг миқдори 500 миллион долларни ташкил қилади. Даромадлилиги 4,25 фоиз миқдорида ўрнатилган мазкур транш 10 йил муддатга чиқарилади. Уни сўндиришнинг охирги муддати 2030 йилнинг ноябрь ойи ҳисобланади. Сўмда деноминация қилинган ебробондларнинг қиймати 250 миллион долларга тенг. Уларнинг даромадлилиги 15,25 фоиз этиб белгиланган бўлиб, мазкур транш 3 йил муддатга чиқарилади. Иккала транш ҳам Лондон фонд биржасига жойлаштирилди.