Бугун,

  • USD 11014.01
  • RUB 191.8
  • EUR 10674.78

Электр таъминоти билан боғлиқ, аҳолининг кескин норозилигига сабаб бўлаётган вазиятни «қандайдир тартиб»га олиш керак. Бу ҳақда самарқандлик сенатор Фармон Тошев Сенатнинг 9-ялпи мажлисида парламент юқори палатаси раҳбари Танзила Норбоевага қилган мурожаатида айтиб ўтди.

Фармон Тошев.

Фармон Тошев.
Фото: Мадина Нурман / «Дарё»

Сенаторнинг қайд этишича, интернетни очиб қарасанг, ҳаммаёқда битта шикоят — «электр йўқ, электр ўчган».

Самарқандда ҳам шу аҳвол. Биз ҳозир Сенатнинг йиғилишида шунга эътибор қилмасак, ҳозир гапирмасак, у идоранинг одамлари гапирадиганга ўхшамайди.

Шунинг учун уларнинг идорасига илтимосим бор эди — нима учун кўп гапларни халққа олдинроқ айтиш мумкин эмас, графигини ишлаб чиқиш мумкин эмас, нима учун ўзининг одамлари орқали жойларга бориб тушунтириш мумкин эмас?

Ахир, ўзингиз ўйлаб кўринг, ҳозир сизнинг Telegram’ингизга ҳам савол тушса, улар орқали жавоб беряпсиз-ку! Халққа нима деймиз биз ҳар куни? Агар жўнатаверсак, жўнатаверсак, бу ҳам, менимча, яхшиликка олиб бормайди.

У одамларнинг вакиллари бизга келганда ҳамманинг олдида сўз берган, «Йўқ, бизда свет ўчмайди, етарли ҳамма нарса, ҳамма нарса коммунизм бўлади», деганди. Кечирасиз-у, ҳозир шаҳарнинг ўзида, менинг уйимда ҳам неча марталаб ўчяпти свет.

Бу нарсаларни қандайдир тартибга олиш керак. Сайлов округига борганда қийналиб қоляпман.

Фармон Тошев, Олий Мажлис Сенати аъзоси 

Аввалроқ Самарқанд вилоятининг 25 фоиз истеъмолчиси ярим кечада электр таъминотидан узилиб қолгани ҳақида хабар берилган эди. Қайд этиш жоиз, Сенат 9-ялпи мажлисининг YouTube’даги жонли эфири фойдаланувчиларнинг электр ва газ таъминотидаги муаммолар ҳақидаги мурожаатларига тўлиб кетган.

Изоҳ
Асосий янгиликлар