Туркияда коронавирус билан касалланиш ҳолатлари ортгани сабаб 12 ноябрдан одам кўп тўпланадиган кўчалар ва жамоат транспортлари бекатларида сигарет чекиш тақиқланди. Бу ҳақда мамлакат Ички ишлар вазирлигига таяниб, «РИА Новости» хабар берди.
«Аввалроқ эълон қилинган фармойишда барча жамоат жойларида, турар жой биноларидан ташқари, фуқаролар ҳеч қандай истисносиз ниқоб тақиши мажбурий этиб белгиланганди. Бироқ шу каби жойларда сигарет чекмоқчи бўлган инсонлар ниқобларини ечмоқда, пастга туширяпти, улардан тўғри фойдаланмаяпти. Шу сабабли 12 ноябрдан барча вилоятлардаги одам кўп тўпланадиган кўчалар ва жамоат транспорти бекатларида чекишга тақиқ ўрнатилади», — дейилади хабарда.
Таъкидланишича, «ҳаво орқали осонликча юқадиган коронавируснинг тарқалишини олдини олишда ниқобларнинг узлуксиз тақилишини таъминлаш жуда муҳим».
Эслатиб ўтамиз, сентябрь ойи бошларида Туркия соғлиқни сақлаш вазири Фахриддин Кожа мамлакат коронавирус инфекцияси тарқалишининг иккинчи тўлқинини бошидан ўтказаётганини маълум қилганди. Ўшанда вазир касаллар сонининг ортишига дам олувчилар профилактика чораларига яхши риоя қилмаётганини сабаб қилиб кўрсатган. Мамлакат иқтисодиёти пандемия сабабли рекорд даражада пасайган.
Сўнгги маълумотларга кўра, Туркияда пандемия бошланганидан буён коронавирусга чалинганлар сони 400 минг кишидан ошган, 11 мингдан ортиқ бемор COVID-19 қурбонига айланган.
Изоҳ (0)