28 октябрь соат 09:00 ҳолатига кўра, Ўзбекистонда 4 миллион 125 минг 938 нафарга яқин одамда коронавирусга ПЗР (полемераза занжир реакцияси) тест таҳлиллари ўтказилган. Бу ҳақда АОКА ҳузуридаги штабда ташкил этилган брифингда Соғлиқни сақлаш вазирлиги ҳузуридаги Коронавирусга қарши кураш штаби аъзоси Ботир Қурбонов маълум қилган.

Скриншот: UzreportТВ

Республикада ташкил этилган 135 тадан ортиқ давлат муассасалари, қолаверса, 20дан ортиқ хусусий тиббиёт муассасалари томонидан ПЗР, ИФА, ИХЛА усулларида коронавирус инфекциясига қарши текшириш тадбирлари амалга ошириб келинмоқда. 27 октябрда кун давомида Ўзбекистонда 23 659 та ПЗР усулида текширувлар амалга оширилди. Яъни ҳар куни 20 мингдан 30 минггача бўлган текширувлар амалга оширилмоқда.

Ботир Қурбонов, Коронавирусга қарши кураш штаби аъзоси

Эслатиб ўтамиз, 15 сентябрь куни ўтказилган брифингда Республика махсус комиссияси ва Коронавирусга қарши кураш штаби аъзоси Нурмат Отабеков мактабларда ўқув жараёнининг бошланиши муносабати билан кунига 60 мингдан кўпроқ аҳоли COVID-19’га текширилаётгани, лаборатория таҳлиллари ўтказилаётганини айтган. Ундан олдинроқ, 7 сентябрь куни Коронавирусга қарши кураш штабининг яна бир аъзоси Рустам Икромов кунига 30 мингдан 40 мингтагача лаборатория тест таҳлили ўтказилаётгани, шундан 200-300 тагача ҳолатда мусбат натижа аниқланаётганини билдирган эди.

Аввалроқ штаб аъзоси Наргиза Нуруллаева Ўзбекистонда COVID-19 билан қайта касалланиш ҳолатлари қайд этилаётганини маълум қилгани, Хитой Фанлар академияси ва Anhui ZhifeiLongcom Biopharmaceutical компанияси томонидан ишлаб чиқарилаётган коронавирусга қарши вакцинанинг клиник синовлари учинчи босқичи Ўзбекистонда ҳам бўлиб ўтиши мумкинлиги ҳақида ҳам хабарлар берилган эди.

Мавзуга доир: