20 октябрь куни Кобулда Ўзбекистон делегацияси иштирокида Афғонистон ва Осиё тараққиёт банки ўртасида 110 миллион доллар ажратишни назарда тутувчи «Сурхон—Пули-Хумри» электр узатиш линияси қуриш лойиҳасини молиялаштириш тўғрисида битим имзоланди. Бу ҳақда Инвестициялар ва ташқи савдо вазирлиги хабар берди.

Фото: Инвестициялар ва ташқи савдо вазирлиги

Маблағларнинг асосий қисми ташкилотнинг ўзбек пудратчилари томонидан амалга оширилиши режалаштирилган қурилиш ишларига йўналтирилади. Яқин келажакда «Ўзбекистон миллий электр тармоқлари» АЖ ва «ДА Афғонистон Брешна Ширкат» ўртасида ушбу ЭУЛни қуриш бўйича тегишли шартнома имзоланади.

Эслатиб ўтамиз, 2019 йилнинг сентябрида «Миллий электр тармоқлари» корхонаси Афғонистоннинг Da Afghanistan Breshna Sherkat компанияси билан 10 йиллик муддатга мўлжалланган «Ол ва тўла» шарти асосидаги контрактни имзолаган эди. Ушбу принцип ОТБнинг лойиҳани молиялаштиришдаги асосий шартларидан бири ҳисобланади. Унга кўра, агар Афғонистоннинг Сурхондарёдан олаётган электр энергиясига бўлган эҳтиёжи тугаса, мамлакат барибир шартнома бўйича тўлаш мажбуриятини зиммасига олади.

«Ўзбекэнерго» Афғонистонга электр энергияси етказиб беришни кўпайтириш мақсадида «Сурхон—Пули-Хумри» электр узатиш линиясини қуришга 2018 йилда киришган эди. 260 километр узунликдаги линия Афғонистонга электр энергияси етказиб беришни 70 фоизга — йилига 6 миллиард киловатт-соатгача кўпайтириш имконини беради. Лойиҳани амалга ошириш муддати 2020 йил охиригача этиб белгиланган.