Сардоба сув омборида рўй берган техноген офат оқибатида зарарланган йўл ва кўприкларни тиклаш ва таъмирлашга жами 390 миллиард 700 миллион сўм маблағ ажратилиб, 2020 йилда амалга ошириладиган ишларга 227 миллиард 700 миллион сўм ва 2021 йил учун эса 81 миллиард сўм сарфланиши белгиланган. Бу ҳақда Сирдарё вилояти ҳокимлиги матбуот хизматига таяниб, «Kun.uz» хабар берди.

Таъкидланишича, мазкур объектлардаги қурилиш-таъмирлаш ишлари учун жами 158 миллиард 100 миллион сўм маблағ молиялаштирилган:

• халқаро аҳамиятдаги А-373 автомобиль йўлининг Тошкент—Самарқанд йўналиши бўйича 21 километр (йўл чети ва атрофларини таъмирлаш) ва 17,7 километр қисмига 24 минг 520 тонна асфальтобетон ётқизилиб, 76 миллиард 500 миллион сўм маблағ молиялаштирилган;
• давлат аҳамиятидаги 4R-31, 4R-18а, 4R-33 ва 4R-199 автомобиль йўлларининг 5,3 километр қисмида таъмирлаш ва тиклаш ишлари бажарилиб, 4 минг 114 тонна асфальтобетон ётқизилган ва 17 миллиард 400 миллион сўм маблағ молиялаштирилган;
• маҳаллий аҳамиятдаги 4К-665 автомобиль йўлининг 3 километри қисмида тиклаш ва таъмирлаш ишлари бажарилиб, 718 тонна асфальтобетон ётқизиш ишларига 1 миллиард 900 миллион сўм маблағ молиялаштирилган;
• ички хўжалик йўлларидан 100,4 километрдан 94 километр қисмида (40,2 км асфальтобетон, 20,1 км цементбетон ва 33,7 км қум-шағал аралашмаси ётқизиш) қурилиш ишлари якунланиб, 42 миллиард сўм маблағ молиялаштирилган.

Шунингдек, 14 та кўприкнинг 10 тасида 20,3 миллиард сўм маблағ ҳисобидан халқаро аҳамиятдаги М-39 ва А-373 йўлларидаги 6 та кўприкда 95 фоиз, давлат аҳамиятидаги 4R-199 ва 4R-31 автомобиль йўлларидаги 7 та кўприкда 85 фоиз, маҳаллий аҳамиятдаги 4К-665 йўлдаги 1 та кўприкнинг 55 фоиз қисмида таъмирлаш-тиклаш ишлари бажарилган.

Қишлоқ хўжалиги ерларига етказилган талафотни бартараф этиш йўналишида ҳам ишлар давом этмоқда.

Тошқин оқибатида 3 та тумандаги 19 минг 356 гектар ер майдонлари турли даражада зарар кўрган (Сардоба — 5359 гектар, Мирзаобод – 5274 гектар, Оқолтин 8723 гектар), жумладан, 7623 гектар чигит экилган майдон (3621 гектари қайта экилган).

Кўрилган зарарни қоплаш мақсадида вилоятнинг бошқа ҳудудларида жами 8424 гектар майдонга чигит, 447 гектар майдонга полиз ва дуккакли экинлар экилган.

Аввалроқ Демократия ва инсон ҳуқуқлари институти директори Сайёра Хўжаева Сардоба ҳалокатидан жабр кўрган Оқолтин тумани «Бешюз» қишлоғи аҳолиси чайлаларда яшаётгани тасвирланган суратлар билан бўлишган эди. Туман ҳокимлиги эса мазкур ҳолатга расмий муносабат билдириб, улар эътибордан четда қолмаганини маълум қилди.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган, ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган, шунингдек, 6 нафар фуқаронинг табиий офат оқибатида ҳалок бўлгани аниқланган.

Июль охирларида Бош прокуратура «Сардоба иши» доирасида тўққиз киши қамоққа олинганини маълум қилган эди. 6 октябрь куни Коррупцияга қарши курашиш агентлиги директори Акмал Бурҳонов «Сардоба иши» бўйича 17 нафар шахсга нисбатан жиноят иши қўзғатилганини билдирган.