Ўзбекистон коронавирусга қарши вакцинани ишлаб чиқариш ва экспорт қилишни режалаштирмоқда, бу синовларнинг учинчи — якуний босқичи тугагандан кейин амалга оширилиши мумкин. Бу ҳақда Санитария-эпидемиология осойишталиги агентлиги директори, соғлиқни сақлаш вазирининг биринчи ўринбосари Баҳодир Юсупалиев 25 сентябрь куни Халқаро пресс-клуб йиғилишида маълум қилди, деб ёзмоқда «Gazeta.uz».
Баҳодир Юсупалиев
Фото: Халқаро пресс клуб
Аввалроқ коронавирусга қарши вакцина яратган Хитойнинг иккита компанияси Ўзбекистонда синовларнинг учинчи босқичини ҳамкорликда ўтказишни таклиф қилганди. Инновацион ривожланиш вазирлиги Sinopharm ва Zhifei Longcom компаниялари билан келишувлар имзолаган.
«Ўзбекистонга Хитойнинг иккита компанияси вакциналарини олиб келиш ва клиник синовларнинг учинчи босқичида иштирок этиш режалаштирилмоқда. Кейин эса бу вакциналарни бизда ишлаб чиқариш масаласи қўйилади, бу импортнинг қисқаришига олиб келади, бунинг устига биз уларни қўшни мамлакатларга ҳам экспорт қила оламиз», — дея маълум қилган Баҳодир Юсупалиев.
Унинг сўзларига кўра, Ўзбекистон Россия компанияларига ҳам қўшма синовлар ўтказишни таклиф қилган. «Бугунги кунда биз уларнинг жавобларини кутяпмиз. Ўйлайманки, улар билан ҳам бир вақтда ишлаймиз», — дея таъкидлаган агентлик раҳбари.
Эслатиб ўтамиз. Ўзбекистон Россиянинг тўғридан-тўғри инвестициялар жамғармасига беш минг доза «Спутник V» вакцинасини ажратишни сўраб мурожаат қилгани ҳақида хабар берилганди. Бунда жамғарма Laxisam компанияси билан Ўзбекистонга мазкур вакцинадан 35 миллион доза етказиб бериш бўйича келишувга эришилганини маълум қилган.
Аввалроқ Ўзбекистон COVID-19 вакцинаси клиник синовларининг барча босқичи якунланмагунича уни сотиб олмаслиги маълум қилинганди. Август ойи бошларида Шавкат Мирзиёев коронавирусга қарши вакцинани харид қилиш масаласини ўрганишга бир ҳафта муддат берганди. Президент топшириғига биноан вакцинани харид қилиш ва мамлакат аҳолисини эмлашни амалга ошириш йўлларини ўрганиб чиқиш мақсадида етакчи олимлар ва тажрибали шифокорлардан иборат ишчи гуруҳ тузилган.
