Европа Иттифоқи Ўзбекистонда COVID-19’га қарши олиб борилаётган тезкор ва самарали курашни қўллаб-қувватлашга қаратилган лойиҳа бўйича 2 миллион евродан ортиқ маблағ ажратди. Бу ҳақда Европа Иттифоқининг республикадаги ваколатхонаси хабар берди.
Фото: «Дарё»
Хабарда айтилишича, ЖССТнинг мамлакатдаги ваколатхонаси томонидан амалга оширилаётган лойиҳа биринчи навбатда тиббиёт муассасаларида беморлар билан бевосита алоқада бўлган тиббиёт ходимларини шахсий ҳимоя воситалари билан таъминлашга қаратилган.
Бугунги кунда Ўзбекистонда COVID-19 ҳолатларини аниқлаш, текшириш, тартиблаш ва даволаш билан боғлиқ ишларда деярли барча шахсий ҳимоя воситаларидан фойдаланилади. Бу эса COVID-19 ташхиси қўйилганлиги тахмин қилинган ёки тасдиқланган беморлар тоифасига кирмайдиган беморлар билан иш олиб борадиган тиббиёт ходимлари, масалан, туғруқхоналарда, сил ва ОИВ билан касалланганлар клиникаларда, стоматология, поликлиникалар ва бошқаларда ҳимоя воситаларисиз қолмоқда. Шунинг учун ЖССТ тавсия этган шахсий ҳимоя воситаларини нафақат COVID-19 беморлари билан муомала қиладиган тиббиёт ходимлари учун, балки бошқа соғлиқни сақлаш хизматлари ва муассасалари ходимлари учун ҳам сотиб олиш COVID-19 тарқалишини камайтиришда муҳим аҳамият касб этади.
«Тиббий ходимлар ҳар кунимизнинг қаҳрамонларидир, улар бизни ҳимоя қилаётганда улар хавфсиз ишлай олишига амин бўлишимиз шарт. Ушбу лойиҳа Ўзбекистонга Европа ҳамжамияти томонидан пандемияга қарши чоралар доирасида ажратилган 36 миллион евро ёрдамнинг асосий қисмини ўзида мужассам этади», — деган Европа Иттифоқининг Ўзбекистондаги Муваққат ишлар вакили Юсси Нарви.
«Харид қилинган сифатли шахсий ҳимоя воситалари мамлакатдаги барча тиббий ходимларга етказиш учун етарлича бўлиб, бу тиббий ходимлар орасида касаллик тарқалиши туфайли яна йўқотишлар рўй беришининг олдини олишга ва аҳоли орасида COVID-19 ҳолатларини камайтиришга хизмат қилади», — деб таъкидлаган ЖССТнинг Ўзбекистондаги ваколатхонаси раҳбари Лианне Куппенс.
Ваколатхонанинг таъкидлашича, ушбу лойиҳа келгуси икки йил ичида мамлакат соғлиқни сақлаш ходимлари учун етарли миқдордаги юқори сифатли шахсий ҳимоя воситаларини сотиб олиш орқали инфекциялар профилактикаси ва инфексион назорат чораларини мустаҳкамлайди.
