Ўзбекистон Ташқи ишлар вазирлиги Озарбайжон ва Арманистон муносабатларидаги кескинликнинг ошиши Ўзбекистонда жиддий ташвиш уйғотаётганлигини маълум қилди.
Фото: «Дарё»
«Ўзаро қарама-қаршилик чоғида ҳарбий кучнинг ишлатилиши икки томондан ҳам кўплаб инсонларнинг қурбон бўлишига олиб келиши мумкин.
Ўзбекистон Мустақил Давлатлар Ҳамдўстлигида раислик қилаётган давлат сифатида МДҲ ҳудудида дўстлик, яхши қўшничилик муносабатлари ва ўзаро ишончни мустаҳкамлаш, баҳсли масалаларни халқаро ҳуқуқ нормаларига қатъий мос равишда тинч йўл билан ҳал қилинишининг муҳимлигини яна бир бор тасдиқлайди.
Озарбайжон ва Арманистоннинг ҳарбий ҳаракатларни тезда тўхтатишга ҳамда можарони суверенитет ва ҳудудий яхлитлик тамойилларига риоя қилган ҳолда тинч йўл билан бартараф этиш мақсадида дипломатик музокараларни бошлашга чақирамиз», – дейилади Ўзбекистон ТИВ баёнотида.
Арманистон ва Озарбайжон ўртасидаги Тоғли Қорабоғ низоси 27 сентябрда юз берган. Иккала томон ҳам ҳарбий ҳаракатларни бошлаб юборган ва бир-бирини провокацияда, чегараларни бузиб, ҳужум уюштирганликда айбламоқда.
Вазият чигаллашаётган паллада Озарбайжон президенти Илҳом Алиев Туркия раҳбари Ражаб Тоййиб Эрдўғон билан телефонда музокаралар олиб борган ва унда Анқара зарурат туғилганда Бокуга ёрдам беришга тайёрлигини маълум қилган. Арманистон бош вазири Никол Пашинян эса Жаҳон ҳамжамиятини Туркиянинг Қорабоғ ишига аралашишига йўл қўймасликка чақирган.
Ўнлаб кишилар ҳалок бўлган Арманистон ва Озарбайжон чегарасида аввалги қуролли тўқнашувлар июль ойи ўрталарида юз берган. Шундан сўнг арманлар ва озарбайжонлар ўртасидаги тўқнашувлар икки мамлакатдан ташқарида, хусусан, Москвада содир бўла бошлади.
Сўнгги 30 йилдан буён Арманистон ва Озарбайжон ўртасидаги муносабатлар Тоғли Қорабоғ ҳудуди сабаб ёмонлашган. Минтақа Озарбайжон ҳудудида жойлашган бўлса-да, 1991 йилда унинг таркибидан чиққан. Тан олинмаган ушбу республика ҳудудида, асосан, арманлар истиқомат қилиб келади. Икки мамлакат ўртасидаги чегарада мунтазам қуролли тўқнашувлар содир бўлиб туради.
