Тошкент шаҳрида 41 ёшли фуқаро ўзига тегишли Malibu-2 машинасининг банк томонидан тақиққа қўйилганини яшириб, уни 28 минг долларга сотган, бироқ мазкур фуқаро узоқ вақт давомида машинани харидорнинг номига расмийлаштириб бермасдан юрган. Бу ҳақда Тергов департаменти томонидан хабар берилди.

Фото: «Дарё»

Маълум қилинишича, 2020 йилнинг 25 март куни Шайхонтоҳур туманида 41 ёшли Р.М. ўзига тегишли Malibu-2 русумли автомашинаси банк томонидан тақиққа қўйилганлигини билган ҳолда автомашинани 28 ёшли А.Қ.га 28 минг долларга сотишини айтган. Сотувчи автомашинада ҳеч қандай тақиқ йўқлигига А.Қ.ни ишонтириб, унинг ишончига кириб, 28 минг долларни қўлга киритган.

Бироқ Р.М. автомашинани А.Қ.нинг номига расмийлаштириш жараёнида автомашина тақиқда эканлиги ошкор бўлган. Шундан сўнг сотувчи аввал олган 28 минг долларни қайтариб беришини ваъда қилиб, автомашинани ўзи билан олиб кетган, у берган ваъдаси устидан чиқмасдан, пулларни ўзининг эҳтиёжларига сарфлаб юборган.

Мазкур ҳолат юзасидан Шайхонтоҳур тумани ИИО ФМБ ҳузуридаги Тергов бўлими томонидан Р.М.га нисбатан Ўзбекистон Республикаси Жиноят кодексининг 168-моддаси 4-қисми «а» банди (жуда кўп миқдорда содир этилган фирибгарлик) билан жиноят иши қўзғатилган. Дастлабки тергов жараёнида Р.М. гумон қилинувчи тариқасида жалб қилинган.