Олий Мажлис депутати, Қонунчилик палатаси Спикери ўринбосари Актам Ҳайитов республика бюджетидан йўл таъмири учун берилган маблағнинг 180 миллиард сўми белгиланган муддатда сарфланмай қолганини, Қашқадарё вилоятининг Деҳқонобод тумани марказига олиб кирувчи М39 халқаро йўли эса таъмирталаблигича қолаётганини маълум қилди. Бу ҳақда «Дарё» мухбири хабар берди.
Актам Ҳайитов.
Фото: «Дарё»
Таъкидланишича, Халқ депутатлари Деҳқонобод туман кенгашининг навбатдаги сессиясида қатнашган Актам Ҳайитов Деҳқонобод тумани марказига олиб кирувчи йўлнинг таъмирталаблиги ҳақида тўхталиб, йўл таъмири учун республика бюджетидан етарли маблағ ажратилса-да, туман йўлини таъмирлаш учун маблағ берилмаганлигини танқид қилган.
«Умумий аҳамиятли йўлларни таъмирлаш мақсадида 2020 йилнинг биринчи чорагида сарфланиши лозим бўлган маблағнинг 180 миллиард сўми ўзлаштирилмаган. Мен ‘шунча пул бўла туриб, нега Деҳқонободнинг йўлини таъмирламаяпсизлар?’, деб сўрадим. Бу ахир халқаро аҳамиятдаги йўл-ку, экспорт масаласи. Чак-чакдан Сурхондарёга қараб ўтсангиз, Термизгача бўлган йўлда ‘стакан’да сув тўкилмайди, бу ерда эса кимгадир боғлиқ бўлиб шунча пул қолиб кетяпти. Транспорт вазирлиги, йўл жамғармаси бунга жавоб бериши керак-ку», — деди Актам Ҳайитов.
Деҳқонобод туман йўллардан фойдаланиш унитар корхонаси масъули Музаффар Назаровнинг маълумот беришича, М39 Олмаота—Бишкек—Тошкент—Термиз автомобиль йўлининг Деҳқонобод тумани ҳудудидан ўтган 1265—1315 км қисми таъмирталаб ҳолга келган.
Ойдинлик киритилишича, мазкур йўлнинг 1265—1292 км қисми 2011—2018 йилларда Бекобод йўл индустрия унитар корхонаси томонидан таъмирланган. Таъмирлаш ишлари 2018 йил Қашқадарё йўл қурилиш-таъмирлаш унитар корхонасига топширилган.
