Видео: Барча шароитлари бор ёғоч уйча ўрнатилган Ford пикапи

Аляскалик Тим Жонсон YouTube’даги каналида 1996 йилда ишлаб чиқарилган ва ҳозирда кемперга айлантирилган Ford F-350 йўлтанламаси ёрдамида амалга оширган саёҳатлари ҳақида маълумот бериб келади. Тимнинг пикапи кузовига ёғоч уйча ўрнатилган бўлиб, унинг ичидан икки ўриндиқли каравот ва шимолий штатнинг қаҳратон шароитида омон қолишда ёрдам берадиган барча зарур нарсалар ўрин олган, деб хабар беради Motor.

Жонсоннинг пикапига 254 от кучига 685 Нм айланувчи моментга эга 7,3 литрли Power Stroke V8 дизель двигатели ўрнатилган бўлиб, у ўз кузовида ёғоч уйни кўтариш ва бир вақтнинг ўзида тиркамани тортиш имконини беради. Уйча кичикроқ кабина кўринишида бўлиб, энг заиф жойларига қадар ишлов берилган: масалан, пол ва бурчаклари кучайтирилган, бу йўлдаги тебранишлар сезилишини камайтиради. Уй девори ичига иссиқликни сақлаб қолиш учун сув ўтказмайдиган қоплама суртилган, иккиталик шишапакетлар ва иссиқлик изоляцияси қопланган.

Том қисмига қуёш панеллари ўрнатилган. Ён томонида эса пропанли баллон жойлашган. Шунингдек, иккита иситгич ҳам бор: ёғоч ва газда ишлайдиган. Раковина йўқ, бироқ 22,7 литр сиғимли кран мавжуд. Бундан ташқари, уйча ичидан музлаткич, иккита кушетка, йиғилувчан каравот ўрин олган. Тим пикапни шу кўринишга келтириш учун 26 минг доллар сарфлаган.

Аввалроқ автоуйлар яратиш ва минивэнларни қайта жиҳозлашга ихтисослашган Midwest Automotive Design фирмаси Mercedes-Benz Sprinter базасидаги янги Daycruiser 144 кемперини тақдим этгани тўғрисида хабар берилганди.