Ўзбекистонда пандемия бошланганидан буён коронавирусга чалинганларнинг қайта касалланиши ҳолатлари кузатилмади. Бу ҳақда Вирусология илмий-текшириш институти клиникасининг бош шифокори, тиббиёт фанлари доктори Муҳайё Асилова маълум қилди.

Фото: ССВ матбуот хизмати

«Юқумли касалликлар даволанганидан сўнг организмда ҳимоя антитаналари ишга тушади ва худди шу вирус организмга тушганда бу касаллик сифатида кечмайди. Шуни ҳам ёддан чиқармаслик керакки, ҳар бир организм алоҳида индивидуал. Айрим инсонларда ҳимоя қилиш ҳужайралари ишлаб чиқилмаслиги мумкин. Орадан беш ой вақт ўтди, аммо COVID-19’дан зарарланган беморлар бизга қайтиб мурожаат қилгани йўқ», — деган у Соғлиқни сақлаш вазирлигига берган интервьюсида.

Соғлиқни сақлаш вазирлиги жамоатчилик билан алоқалар бўлими раҳбари Фурқат Санаевнинг билдиришича, Муҳайё Асилова коронавирус Ўзбекистонга кириб келган дақиқалардан буён ўз жамоаси билан касаллик ўчоғида бўлиб, COVID-19 қайд этилган биринчи беморни қабул қилган.

«Ўзбекистонда коронавирус жорий йил 15 март куни илк бор институтимиз клиникаси лабораториясида аниқланди. Ҳеч эсимдан чиқмайди, ўша куни кечаси соат 3:00 атрофида лаборатория ходимлари қўнғироқ қилиб, хориждан келган ватандошимизнинг натижалари мусбат чиққани ҳақида хабар беришди. Очиғи, ўша кунгача бу офат бизга етиб келмаслигига умид бор эди. Дарҳол шифохонага етиб бордим ва вирус юқтирган бемор ётган палатага кирдим. Унинг ўзи ҳали коронавирусга чалинганидан бехабар эди. Натижа ҳақида хабар берганимизда, у, табиийки тушкунликка тушди. ‘Болаларим энди нима бўлади, пневмониядан ўлим кетаманми?’, дерди.

Вақт йўқотишимиз мумкин эмасди. Дарҳол даволашни бошладик. Жараён жуда тез бошланиб кетди, лекин бемордан кўра ўзимда қўрқув катта эди. Шундай бўлса-да, даволаш чораларини ва карантинни тўғри ташкил қила олдик. Беморлар ошишини ҳисобга олиб, ўша куннинг ўзида барча ходимларга беморларга сидқидилдан хизмат кўрсатишимизни айтдим. Шукрки, ҳеч бир ходимим беморларга қарашдан бош тортмади. Ходимларимга намуна бўлишим учун ҳам беморлар парваришида ўзим иштирок этдим», — дея илк бор COVID-19 инфекцияси қайд этилган ҳолатни эсга олган шифокор.

Муҳайё Асилова, шунингдек, коронавируснинг салбий асоратлари ҳақида ҳам тўхталиб ўтган. «Унинг энг катта хавфи ўпка фиброзига, яъни чандиғига олиб келади. Ҳаво етиб бориш клапанларини ёпади. Натижада бемор кейинчалик нафас ва юрак етишмовчилигидан азият чекади. Ўпка чандиғи узоқ йилларда тикланади. Гоҳида бу бир умрлик ногиронликка ҳам олиб келиши мумкин», — дейди шифокор.

Унинг айтишича, касалликнинг  енгил турини юқтирганлар 7-8, ўрта аҳволдагилар 10-12 кун, оғир турини бошидан ўтказаётганлар эса ойлаб даволанмоқда. Ҳар битта беморга даво чоралари кўрилганидан кейин коронавирусга тест топширади. Натижа манфий кўрсатса, шифохонадан жавоб берилади.

«Коронавируснинг хавфли эканига ишонмаётган юртдошларимга айтар сўзим: вирус мавжуд ва у ўз ўлжаларини таслим қилмоқда. Айниқса, ҳозирги коронавирус штампининг оғир тури келмоқда. Кўчада ниқобсиз ва масофа сақламай юрганлар ҳаёт учун курашаётган беморлар ҳолатини ўз кўзи билан кўрса, балки ўшанда жиддий қарарди. Кўпчилик ‘Қачон вирус тугайди?’, деб сўрашади. Агар касаллик занжирини узмасак, вакцина ишлаб чиқилмагунча шу ҳаётда яшаймиз», — деб таъкидлаган у.

Маълумот учун, Ўзбекистонда коронавирус қайд этилганлар сони 6 август, соат 17:00 ҳолатига кўра 28 315 нафарга етди. Уларнинг 19 291 нафари (68 фоиз) соғайган. Яна 8 849 нафар беморга шифокорлар томонидан белгиланган стандартлар бўйича даво чоралари кўрилмоқда.