Фарғона вилоятида коронавирусга қарши курашаётган 148 нафар шифокорга 4 миллиард 658 миллион сўм тўлаб берилган. Бу ҳақда «Дарё»га вилоят соғлиқни сақлаш бошқармаси маълум қилди.

Маълумотга кўра, коронавирус инфекциясидан зарарланган беморлар билан мулоқотга киришган, беморлар жойлаштирилган шифохона ва карантин муассасаларида фаолият олиб борган 599 нафар тиббиёт, санитария-эпидемиология хизмати ва бошқа ходимларга 11 миллиард 471 миллион сўм махсус рағбатлантириш тўловлари ажратилган.

Қайд этилишича, коронавирусни юқтирган беморларни даволашда қатнашаётган 148 нафар шифокорга 4 миллиард 658 миллион сўм, 227 нафар ўрта тиббиёт ходимига 4 миллиард 380 миллион сўм, 157 нафар кичик тиббиёт ходимига 2 миллиард 59 миллион сўм, 67 нафар бошқа хизмат кўрсатган ходимга 374 миллион сўм тўлаб берилган.

Таъкидланишича, 7977 нафар тиббиёт, санитария-эпидемиология хизмати ва бошқа ходимларга коронавирус инфекцияси тарқалишига қарши курашиш тадбирларига жалб қилинадиган даврда ойлик иш ҳақига 6 фоиз кунлик устама ҳисобланиб, уларга жами 8 миллиард 14 миллион сўм тўлаб берилган.

Шунингдек, беморлар билан ишлаган вақтида коронавирус инфекциясини юқтириб олган икки нафар ходимга 282,5 миллион сўм бир марталик тўлов ажратилган.

Эслатиб ўтамиз, мамлакатда коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт ходимларига ҳар 14 кунлик фаолият даври учун махсус қўшимча рағбатлантириш тўлови белгиланган. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.

Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.