Ўзбекистонда 2020 йил 22 июль соат 23:30 ҳолатига кўра, коронавирус инфекцияси қайд этилган беморлар сони 55 кишига ортиб, 18 379 нафарга етди. Бу ҳақда Соғлиқни сақлаш вазирлиги хабар берди.
Янги касалланиш ҳолатларининг
- 47 таси Бухоро вилоятида;
- 8 таси Самарқанд вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Кун давомида Тошкент шаҳридаги тиббиёт муассасаларида 102 нафар, Андижон вилоятида 112 нафари, Наманган вилоятида 61 нафар, Қашқадарё вилоятида 31 нафар, Сурхондарё вилоятида 15 нафар, Фарғона вилоятида 14 нафар, Сирдарё вилоятида 9 нафар, Қорақалпоғистонда 4 нафар ҳамда Жиззах вилоятида 3 нафар, жами 351 нафар бемор коронавирус инфекциясидан тузалган. Бу тузалиш кўрсаткичи бўйича янги рекорд.
Ўзбекистонда COVID-19’дан соғайганлар сони 9872 нафарни (53 фоиз) ташкил қилмоқда. 8409 нафар беморга шифокорлар томонидан белгиланган стандартлар бўйича даво чоралари кўрилмоқда, дейилади ССВ хабарида.
Ўзбекистонда COVID-19 эпидемияси бошланганидан бери «Дарё» ҳисоби бўйича 103 та, ССВ тақдим этиб бораётган статистика бўйича эса 98 та ўлим ҳолати қайд этилган.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Кейинчалик Бош прокуратура ахборот хизмати Ўзбекистон бош прокурорининг собиқ ўринбосари, Қорақалпоғистон собиқ прокурори Ҳакимбай Халимов коронавирус асоратларидан вафот этганини хабар қилди. Бироқ ССВ ушбу ҳолатлар ҳақида айни вақтгача ахборот бермаган.
Изоҳ (0)