«Дарё»ни Telegram’да ўқинг! Join!
19:11, 22.07.2020 54876

Бош прокурорнинг собиқ ўринбосари Ҳакимбай Халимов 66 ёшида коронавирус асоратларидан вафот этди

Ўзбекистон бош прокурорининг собиқ ўринбосари, Қорақалпоғистон собиқ прокурори Ҳакимбай Халимов коронавирус асоратларидан вафот этди.

Ҳакимбай Халимов.

Фото: Бош прокуратура

«Бош прокуратура раҳбарияти ва жамоаси Қорақалпоғистон Республикаси прокуратураси органларида хизмат қилган 3-даражали Давлат адлия маслаҳатчиси (генерал майор) Халимов Ҳакимбай Ашировичнинг вафоти муносабати билан марҳумнинг қариндош ва яқинларига чуқур таъзия изҳор этади», — дейилади Бош прокуратуранинг жамоатчилик билан алоқалар ва ҳуқуқий ахборот бўлими бошлиғи Ҳаёт Шамсуддиновнинг Telegram каналида эълон қилинган хабарда.

Бош прокуратуранинг «Дарё»га маълум қилишича, 1954 йилда туғилган Ҳакимбай Халимов Қорақалпоғистон прокуратурасида бўлим бошлиғи лавозимида ишлаган. Ҳакимбай Халимовда бир неча кун олдин коронавирус аниқланган ва 22 июль куни вафот этган.

Ҳакимбай Халимов Ўзбекистон бош прокурори собиқ ўринбосари, Қорақалпоғистон прокурори лавозимларида ишлаган. 2017 йилдан 2019 йилгача Президентнинг Қорақалпоғистондаги Халқ қабулхонаси раҳбари бўлган. 2019 йилдан бери Қорақалпоғистон прокуратурасида бўлим бошлиғи лавозимида ишлаган.

Соғлиқни сақлаш вазирлиги 18 июль ҳолатига кўра, Қорақалпоғистонда 9 беморнинг аҳволи оғирлиги ҳақида хабар берганди.

Ҳакимбай Халимов коронавирус асоратларидан вафот этган Қорақалпоғистондаги учинчи бемор бўлди. Соғлиқни сақлаш вазирлиги прокурорнинг вафоти бўйича ҳозирча ахборот бермаган.

Бу «Дарё» ҳисоби бўйича 102-ўлим ҳолатидир. Ҳозиргача ушбу ўлим ҳолатларининг 97 таси ҳақида ССВ ахборот берган.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Бироқ ушбу ҳолатлар ҳақида ССВ томонидан айни вақтгача ахборот берилмаган.

Эслатиб ўтамиз, Қорақалпоғистон Жўқорғи Кенгеси раиси Муса Ерниязов ҳам коронавирусга чалиниб, Нукусда даволанмоқда.

Изоҳ қолдиришдан аввал, қоидалар билан танишиб олинг: http://dy.uz/sBU7c

Бошқа янгиликлар