Самарқанд вилояти Нуробод тумани ҳокими Фахриддин Зоиров коронавирусга чалиниб, ҳозирда соғайгани ҳақида маълум қилди. Бу ҳақда ЎзА хабар берди.
«Мен коронавирус инфекциясидан соғайдим. Ҳозир ўзимни жуда яхши ҳис этяпман. Аммо ҳали ҳам қаерда касалликни юқтириб олганимни тасаввур қила олмаяпман. Шуни билдимки, ҳеч ким коронавирусга эътиборсизлик билан қарамаслиги керак. Саломатлик ва хавфсизлик мутлақ устувор вазифадир. Шунинг учун барчамиз карантин қоидаларига қатъий риоя қилиб, ўзимиз, яқинларимиз соғлиғини асрайлик. Биргаликда бу синовли дамларни енгиб ўтамиз», — деди Фахриддин Зоиров.
Эслатиб ўтамиз, Қорақалпоғистон Вазирлар Кенгаши раиси Муса Ерниязов коронавирусга чалинган, у Нукус шаҳридаги клиникада даволанмоқда. Муса Ерниязов коронавирусдан даволанаётгани ҳақидаги дастлабки гап-сўзлар июль ойи бошида пайдо бўлган, бироқ коронавирусга қарши кураш бўйича Нукусдаги штаб, Қорақалпоғистон Соғлиқни сақлаш вазирлиги ва Жўқорғи Кенгеси июль ойининг бошида ушбу хабарларни инкор этган. Ўзбекистон соғлиқни сақлаш вазири Алишер Шодмонов 18 июль куни Қорақалпоғистонга ташриф буюрган ҳамда хорижлик ва маҳаллий мутахассислар ва олимлар иштирокида Муса Ерниязовнинг аҳволи таҳлил қилинган.
Мавзуга доир: Сурхондарё ҳокимининг коронавирусга чалингани бир неча кун яширилди. У COVID-19’ни юқтириб олган ягона ҳоким эмас
Изоҳ (0)