Хонанда Каниза Instagram’даги stories орқали фолловерларига видеомурожаат йўллаб, коронавирусга чалинганини билдирди. У, шунингдек, кечаси аҳволи оғирлашгани, шу сабабли тез ёрдамга қўнғироқ қилгани, бироқ тез ёрдам келмаганини ҳам айтиб, соғлиқни сақлаш тизимини танқид остига олди.
Канизанинг айтишича, у 8 июлдан бери касал. Коронавирусга тест топширган, бироқ тест унда вирус йўқлигини кўрсатган. Шунда ҳам хонанда ўзини коронавирусга чалинган, деб ҳисобламоқда.
«Ёнимда администраторим бор, у ҳам касалланган уйда ўзимиз врачларнинг кўрсатмалари билан даволанишга ҳаракат қиляпмиз. Кеча ярим тунда аҳволим ёмонлашди, тинмасдан тез ёрдамга қўнғироқ қилдик — ҳеч ким жавоб бермади. Охири кечаси безовта қилсам ҳам таниш врачларимни чақиртирдим.
Мен-ку иложини қиламан. Аввало Оллоҳнинг ёрдами, кейин таниш-билишларимни, имкониятимни ишга соламан. Лекин оддий халқнинг ичида ҳатто тест топширишга имконияти йўқлар бор, оғир ҳолатда қаёққа боришини, нима қилишини билмасдан юрганлар бор. Мен бу видеони ўшаларга озгина ёрдам бўлсин, ҳеч бўлмаса тез ёрдам жонига оро кирсин деган мақсадда қўйдим», — дейди Каниза.
Аввалроқ хонанда Муниса Ризаева ҳам тана ҳарорати кўтарилгани туфайли коронавирусга тест топширган, бироқ натижа салбий чиққанини маълум қилган эди.
Мавзуга доир: «Беном» гуруҳи хонандаси Комил коронавирус юқтириб олди
Изоҳ (0)